റിയാദ് – പത്തൊമ്പതു വര്‍ഷത്തിലേറെ കാലം അമേരിക്കയില്‍ ജയിലില്‍ കഴിഞ്ഞ സൗദി പൗരന്‍ ഹുമൈദാന്‍ അല്‍തുര്‍ക്കി സൗദിയിലേക്ക് യാത്ര തിരിച്ചു. മൂന്ന് മാസം മുമ്പ് മോചിതനായ ഹുമൈദാന്‍ അല്‍തുര്‍ക്കി നടപടിക്രമങ്ങളെല്ലാം പൂര്‍ത്തിയായതിനെ തുടര്‍ന്നാണ് സ്വദേശത്തേക്ക് മടങ്ങിയത്. തന്റെ വീട്ടില്‍ ജോലി ചെയ്തിരുന്ന ഇന്തോനേഷ്യന്‍ വീട്ടുജോലിക്കാരിയെ ആക്രമിച്ച കേസിലാണ് ഹുമൈദാന്‍ അല്‍തുര്‍ക്കിക്ക് 19 വര്‍ഷം ജയിലില്‍ കഴിയേണ്ടിവന്നത്.
ദൈവത്തിന്റെ പൂര്‍ണമായ അനുഗ്രഹങ്ങള്‍ക്ക് സ്തുതി. ഞങ്ങളുടെ പിതാവ് ഹുമൈദാന്‍ അല്‍തുര്‍ക്കി വീട്ടിലേക്ക് മടങ്ങുകയാണ്. ആദ്യം ദൈവത്തിന് നന്ദി പറയുന്നു, തുടര്‍ന്ന് തിരുഗേഹങ്ങളുടെ സേവകന്‍ സല്‍മാന്‍ രാജാവിനും കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരനും ഞങ്ങള്‍ ആത്മാര്‍ഥമായ നന്ദി അറിയിക്കുന്നു. ജന്മനാട്ടിലേക്കുള്ള തിരിച്ചുവരവില്‍ കാര്യമായ സ്വാധീനം ചെലുത്തിയ അമേരിക്കയിലെ സൗദി എംബസി ശ്രമങ്ങളെ അഭിനന്ദിക്കുന്നു – ഹുമൈദാന്‍ അല്‍തുര്‍ക്കിയുടെ മകന്‍ തുര്‍ക്കി തന്റെ ത സോഷ്യല്‍ മീഡിയ അക്കൗണ്ടില്‍ എഴുതി.
മെയ് 9 ന് സൗദി സമയം പുലര്‍ച്ചെ കൊളറാഡോ കോടതി ഹുമൈദാന്‍ അല്‍തുര്‍ക്കിയുടെ കേസ് അവസാനിപ്പിക്കാനും മുന്‍ ശിക്ഷയില്‍ നിന്ന് അദ്ദേഹത്തെ കുറ്റവിമുക്തനാക്കാനും തീരുമാനിക്കുകയായിരുന്നു. അമേരിക്കയിലെ സൗദി എംബസിയിലെ അഭിഭാഷകന്റെയും ഹുമൈദാന്‍ അല്‍തുര്‍ക്കിയുടെ പെണ്‍മക്കളുടെയും സാന്നിധ്യത്തിലാണ് കോടതി വിചാരണ പൂര്‍ത്തിയാക്കി വിധി പ്രസ്താവിച്ചത്. ജയില്‍ മോചിതനായ ഹുമൈദാന്‍ അല്‍തുര്‍ക്കിയെ, സൗദി അറേബ്യയിലേക്ക് മടങ്ങാനുള്ള നടപടിക്രമങ്ങള്‍ പൂര്‍ത്തിയാകുന്നതുവരെ ഇമിഗ്രേഷന്‍ ഡിപ്പാര്‍ട്ട്മെന്റ് ജയിലിലേക്ക് മാറ്റുകയായിരുന്നു.
ഉപരിപഠനത്തിന് ഭാര്യക്കും മക്കള്‍ക്കുമൊപ്പം അമേരിക്കയിലെത്തിയ ഹുമൈദാന്‍ അല്‍തുര്‍ക്കി ഇന്തോനേഷ്യന്‍ വീട്ടുജോലിക്കാരിയെ ആക്രമിച്ചതിനും നിയമവിരുദ്ധമായി തടങ്കലില്‍ വെച്ചതിനും 2006 ല്‍ അറസ്റ്റ് ചെയ്യപ്പെടുകയായിരുന്നു. 2001 സെപ്റ്റംബര്‍ 11 ന് അല്‍ഖാഇദ അമേരിക്കയില്‍ നടത്തിയ ഭീകരാക്രമണങ്ങളെ തുടര്‍ന്ന് അമേരിക്കയില്‍ മുസ്‌ലിം വിരുദ്ധ വികാരം ആളിക്കത്തിയ പശ്ചാത്തലത്തില്‍ ഹുമൈദാന്‍ അല്‍തുര്‍ക്കിയുടെ കേസും ഏറെ വിവാദമായി. തനിക്കെതിരായ ആരോപണങ്ങളില്‍ താന്‍ നിരപരാധിയാണെന്ന് ഹുമൈദാന്‍ അല്‍തുര്‍ക്കി വാദിച്ചു. അല്‍ഖാഇദ ഭീകരാക്രമണങ്ങള്‍ കാരണം താന്‍ ലക്ഷ്യം വെക്കപ്പെടുകയായിരുന്നെന്നും അമേരിക്കക്കാര്‍ക്കിടയില്‍ ശക്തമായ മുസ്‌ലിം വിരുദ്ധ വികാരത്തിന്റെ ഇരയാണെന്നും ഹുമൈദാന്‍ പറഞ്ഞു.
സൗദി ഭാഷാ പണ്ഡിതനായ ഹുമൈദാന്‍ അല്‍തുര്‍ക്കിയെ 2006 ഓഗസ്റ്റില്‍ കൊളറാഡോ കോടതി 28 വര്‍ഷം തടവിന് ശിക്ഷിച്ചു. 37-ാം വയസില്‍ കൊളറാഡോ സ്റ്റേറ്റ് ജയിലില്‍ പ്രവേശിച്ച അദ്ദേഹം 19 വര്‍ഷം തടവ് ശിക്ഷ അനുഭവിച്ചു. കഴിഞ്ഞ മെയ് മാസത്തില്‍ കോടതി കേസ് അവസാനിപ്പിച്ചതിനെ തുടര്‍ന്ന് മോചിതനായ ഹുമൈദാന്‍ അല്‍തുര്‍ക്കി 56-ാം വയസിലാണ് സൗദി അറേബ്യയിലേക്ക് മടങ്ങുന്നത്.
ഹുമൈദാന്‍ അല്‍തുര്‍ക്കിയുടെ കേസ് വലിയ മാധ്യമ ശ്രദ്ധ നേടിയിരുന്നു. കേസ് പുനഃപരിശോധിക്കാനും നിരുപാധികമായ മോചനം അംഗീകരിക്കാനും അപേക്ഷിച്ച് രണ്ടു ദശകത്തിനിടെ അദ്ദേഹവും കുടുംബവും പലതവണ ഹര്‍ജികള്‍ ഫയല്‍ ചെയ്തിരുന്നെങ്കിലും അവയെല്ലാം തള്ളുകയായിരുന്നു.