ദമാം- സൗദി അറേബ്യയിലെ കിഴക്കൻ പ്രവിശ്യയിൽപ്പെട്ട അൽഹസയിലെ ഹുഫൂഫിൽ വില്ലയുടെ മുൻഭാഗം പൊളിക്കാൻ സ്വീകരിച്ച വേറിട്ട രീതി സോഷ്യൽ മീഡിയയിൽ വലിയ ചർച്ചയാകുന്നു. സാധാരണ രീതിയിൽ നിന്ന് വിഭിന്നമായി, ഒരു വലിയ ക്രെയിൻ ഉപയോഗിച്ച് ബുൾഡോസർ വായുവിൽ ഉയർത്തി നിർത്തിയാണ് കെട്ടിടത്തിന്റെ മുകൾഭാഗം പൊളിച്ചത്. വിചിത്രവും അപകടകരവുമായ ഈ പ്രവൃത്തിയുടെ വീഡിയോ ദൃശ്യങ്ങൾ പുറത്തുവന്നതോടെ നിരവധി പേരാണ് ഇതിനെതിരെ രംഗത്തെത്തിയത്. തൊഴിലാളികളുടെയും സമീപത്തുണ്ടായിരുന്നവരുടെയും ജീവൻ പണയപ്പെടുത്തിയുള്ള ഈ നീക്കം അതീവ അപകടകരമാണെന്ന് വീഡിയോ കണ്ടവർ അഭിപ്രായപ്പെട്ടു.
ഈ അസാധാരണ ആശയത്തോടുള്ള പ്രതികരണങ്ങൾ സമ്മിശ്രമാണ്. ചിലർ ഇതിനെ നൂതനമായ ഒരു ചിന്തയായി കണ്ട് അത്ഭുതം പ്രകടിപ്പിച്ചപ്പോൾ, ഭൂരിഭാഗം പേരും ഇതിലെ അപകടസാധ്യത ചൂണ്ടിക്കാട്ടി കടുത്ത വിമർശനമാണ് ഉയർത്തുന്നത്. തൊഴിലിടങ്ങളിലെ സുരക്ഷാ മാനദണ്ഡങ്ങളും ആരോഗ്യ നിയമങ്ങളും പൂർണ്ണമായും ലംഘിച്ചാണ് ഇത്തരമൊരു പ്രവർത്തി ചെയ്തതെന്ന് സോഷ്യൽ മീഡിയ ഉപയോക്താക്കൾ പറയുന്നു. നിയമപരമായ സുരക്ഷാ ക്രമീകരണങ്ങൾ പാലിക്കാതെ നിർമ്മാണ പ്രവർത്തനങ്ങൾ നടത്തുന്നത് വലിയ അപകടങ്ങൾക്ക് കാരണമാകുമെന്ന മുന്നറിയിപ്പോടെയാണ് ഈ വീഡിയോ വ്യാപകമായി പ്രചരിക്കുന്നത്.