മക്ക – അടുത്ത ഹജ് സീസണില്‍ തീര്‍ഥാടകര്‍ക്ക് താമസസൗകര്യം നല്‍കുന്നതിന് വാടകക്ക് നല്‍കാന്‍ ആഗ്രഹിക്കുന്ന കെട്ടിട ഉടമകളില്‍ നിന്നും ഇന്‍വെസ്റ്റ്‌മെന്റ് കമ്പനികളില്‍ നിന്നും മക്ക നഗരസഭക്കു കീഴിലെ പില്‍ഗ്രിംസ് ഹൗസിംഗ് കമ്മിറ്റി ഇന്നു മുതല്‍ ലൈസന്‍സ് അപേക്ഷകള്‍ സ്വീകരിക്കാന്‍ തുടങ്ങി. മക്ക നഗരസഭ അംഗീകാരമുള്ള എന്‍ജിനീയറിംഗ് ഓഫീസുകള്‍ വഴിയാണ് ലൈസന്‍സ് അപേക്ഷകള്‍ സമര്‍പ്പിക്കേണ്ടത്. നഗരസഭാ അംഗീകാരമുള്ള 29 എന്‍ജിനീയറിംഗ് ഓഫീസുകളാണ് മക്കയിലുള്ളത്.
ഇക്കഴിഞ്ഞ ഹജ് കാലത്ത് മക്കയില്‍ 3,214 കെട്ടിടങ്ങള്‍ക്കാണ് തീര്‍ഥാടകരെ താമസിപ്പിക്കാന്‍ മക്ക നഗരസഭ ലൈസന്‍സ് അനുവദിച്ചത്. ആകെ 4,20,529 റൂമുകളുള്ള ഈ കെട്ടിടങ്ങളില്‍ 18,18,710 ഹജ് തീര്‍ഥാടകര്‍ക്ക് താമസസൗകര്യം നല്‍കാന്‍ ശേഷിയുണ്ടായിരുന്നു. അംഗീകൃത എന്‍ജിനീയറിംഗ് ഓഫീസ് ഉദ്യോഗസ്ഥര്‍ കെട്ടിടങ്ങളില്‍ പരിശോധനകള്‍ നടത്തി എല്ലാവിധ സുരക്ഷാ വ്യവസ്ഥകളും മാനദണ്ഡങ്ങളും പൂര്‍ണമാണെന്ന് ഉറപ്പുവരുത്തിയ ശേഷമാണ് മക്ക നഗരസഭക്ക് ലൈസന്‍സ് അപേക്ഷകള്‍ സമര്‍പ്പിക്കുക.
മദീനയിലും പില്‍ഗ്രിംസ് ഹൗസിംഗ് കമ്മിറ്റി ഇന്നു മുതല്‍ കെട്ടിടങ്ങള്‍ക്കുള്ള ലൈസന്‍സ് അപേക്ഷകള്‍ സ്വീകരിക്കാന്‍ തുടങ്ങിയിട്ടുണ്ട്. റജബ് മാസം അവസാനം വരെ അപേക്ഷകള്‍ സ്വീകരിക്കും. എല്ലാ വ്യവസ്ഥകളും പൂര്‍ണമാണെന്ന് ഉറപ്പുവരുത്തി നിശ്ചിത സമയത്തിനകം അപേക്ഷകള്‍ സമര്‍പ്പിക്കണമെന്ന് കെട്ടിട ഉടമകളോടും നിക്ഷേപകരോടും കമ്മിറ്റി ആവശ്യപ്പെട്ടു.