റിയാദ്: സൗദി അറേബ്യയിലെ എല്ലാ മേഖലകളിലും എൽപിജി ഗ്യാസ് നിറയ്ക്കുന്നതിനുള്ള വില ഏകീകരിക്കുന്നതായി ഗാസ്കോ (GASCO) അറിയിച്ചു. 2026 ജനുവരി 1 മുതൽ പുതിയ നിരക്കുകൾ പ്രാബല്യത്തിൽ വരും. 11 കിലോഗ്രാം ഗ്യാസ് സിലിണ്ടറിന് 26.23 റിയാലും, 5 കിലോഗ്രാം സിലിണ്ടറിന് 11.93 റിയാലുമാണ് പുതുക്കിയ വില. കേന്ദ്ര ഗ്യാസ് ടാങ്കുകൾക്ക് ലിറ്ററിന് 1.1770 റിയാൽ എന്ന നിരക്കും നിശ്ചയിച്ചിട്ടുണ്ട്. ഗതാഗതച്ചെലവും മൂല്യവർധിത നികുതിയും (വാറ്റ്) ഉൾപ്പെടുത്തിയതാണ് ഈ നിരക്കുകൾ.
സൗദി അരാംകോ ഡീസൽ വിലയിൽ 7.8 ശതമാനം വർധന പ്രഖ്യാപിച്ചു. ഇതോടെ ഡീസൽ വില ലിറ്ററിന് 1.79 റിയാലായി. അരാംകോ 2022 മുതൽ വർഷത്തിന്റെ തുടക്കത്തിൽ ഡീസൽ വില പുനഃപരിശോധിക്കുന്ന സംവിധാനം നടപ്പിലാക്കിയിട്ടുണ്ട്. 2015 വരെ ലിറ്ററിന് 0.25 റിയാലായിരുന്ന ഡീസൽ വില പിന്നീട് ഘട്ടംഘട്ടമായി ഉയർത്തുകയായിരുന്നു. 2022 മുതൽ ആരംഭിച്ച വാർഷിക പുനഃപരിശോധനയിൽ 2026-ലെ പുതുക്കൽ അഞ്ചാമത്തേതാണ്.