ജിദ്ദ: ജിദ്ദ കെ.എം.സി.സി സെൻട്രൽ കമ്മിറ്റി നടപ്പിലാക്കുന്ന ‘കാരുണ്യ ഹസ്തം കുടുംബ സുരക്ഷാ പദ്ധതി’ 2027 വർഷത്തെ ക്യാമ്പയിൻ ഒക്ടോബർ 15-ന് ആരംഭിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു.
മരണാനന്തര ആനുകൂല്യങ്ങൾക്കും ചികിത്സാ സഹായത്തിനും പുറമെ, പദ്ധതിയിലെ അംഗങ്ങൾക്ക് വർഷത്തിൽ ഒരിക്കൽ ജിദ്ദ കെ.എം.സി.സി നാട്ടിൽ സ്ഥാപിക്കുന്ന പ്രവാസി മെഡിക്കൽ സെന്ററുകളിൽ സൗജന്യ നിരക്കിൽ മെഡിക്കൽ ചെക്കപ്പ് സൗകര്യവും ലഭ്യമാക്കും.
പ്രധാന തീരുമാനങ്ങൾ:
സ്കോളർഷിപ്പ് പദ്ധതി:
സുരക്ഷാ പദ്ധതി അംഗങ്ങളുടെ മക്കൾക്ക് ഉന്നത വിദ്യാഭ്യാസത്തിന് സ്കോളർഷിപ്പ് നൽകും. പി.എച്ച്.ഡി (PhD), സി.എ (CA), എം.ബി.ബി.എസ് (MBBS), ബി.ടെക് (B-Tech) തുടങ്ങിയ പ്രൊഫഷണൽ കോഴ്സുകൾക്കാണ് സ്കോളർഷിപ്പ് അനുവദിക്കുക.
അംബേദ്കർ സ്കോളർഷിപ്പ്:
ദളിത് വിദ്യാർഥികൾക്കായി ഡോ. ബി.ആർ. അംബേദ്കറുടെ പേരിൽ പ്രൊഫഷണൽ കോഴ്സുകൾക്ക് പ്രത്യേക സ്കോളർഷിപ്പ് നൽകും.
കെ.എം. സീതി സാഹിബ് അവാർഡ്:
ന്യൂനപക്ഷ രാഷ്ട്രീയ ശാക്തീകരണത്തിന് മികച്ച സംഭാവന നൽകിയ വ്യക്തികൾക്ക് മുൻ നിയമസഭാ സ്പീക്കറും നവോത്ഥാന നായകനുമായ കെ.എം. സീതി സാഹിബിന്റെ നാമധേയത്തിൽ നാട്ടിൽ അവാർഡ് നൽകും.
ബാഫഖി തങ്ങൾ സ്മാരക പുരസ്കാരം:
പ്രവാസ ലോകത്ത് സാമൂഹിക, സാംസ്കാരിക, വ്യവസായ രംഗങ്ങളിൽ മികച്ച സംഭാവനകൾ നൽകിയവരെ കണ്ടെത്തി ബാഫഖി തങ്ങൾ സ്മാരക പുരസ്കാരം നൽകും.
സുരക്ഷാ പദ്ധതി അംഗങ്ങളിൽപ്പെട്ട മുന്നൂറിലധികം പേർക്ക് നിലവിൽ പ്രതിമാസ പ്രവാസി പെൻഷൻ നൽകിവരുന്നുണ്ട്. രണ്ട് കോടിയോളം രൂപയുടെ സഹായധനം അടുത്ത മാസം നാട്ടിൽ വിതരണം ചെയ്യുമെന്നും പ്രസിഡന്റ് അബൂബക്കർ അരിമ്പ്ര, ജനറൽ സെക്രട്ടറി വി.പി. മുസ്തഫ, ട്രഷറർ വി.പി. അബ്ദുൽ റഹ്മാൻ, സാബിൽ മമ്പാട്, ഇസ്ഹാഖ് പൂണ്ടോളി, റസാഖ് മാസ്റ്റർ, കെ.കെ ബാവ, സിറാജ് കണ്ണവം, നാസർ മച്ചിങ്ങൽ, ലത്തീഫ് മുസ്ലിയാരങ്ങാടി, മീഡിയ വിംഗ് ഇൻചാർജ് മൂസ പട്ടത്ത്, സോഷ്യൽ മീഡിയ ഇൻചാർജ് ഫൈറൂസ് കൊണ്ടോട്ടി എന്നിവർ വാർത്താസമ്മേളനത്തിൽ വ്യക്തമാക്കി.