ദുബൈ: പ്രവാചകൻ മുഹമ്മദ് നബിയുടെ മഹത്തായ ജീവിതവും സുന്നത്തും ഓരോ വിശ്വാസിയുടെയും ജീവിതത്തിന് വഴികാട്ടിയാകണമെന്ന് സിംസാറുൽ ഹഖ് ഹുദവി അഭിപ്രായപ്പെട്ടു. ദുബൈ കെ.എം.സി.സി കാസർഗോഡ് ജില്ലാ കമ്മിറ്റി അബുഹൈൽ കെ.എം.സി.സി സംഘടിപ്പിച്ച ‘മദ്ഹേ മദീന റബീഹ് കോൺഫറൻസിൽ’ മുഖ്യപ്രഭാഷണം നടത്തുകയായിരുന്നു അദ്ദേഹം.
നബിയുടെ ജീവിതം സ്നേഹത്തിന്റെയും കാരുണ്യത്തിന്റെയും സഹനത്തിന്റെയും സത്യസന്ധതയുടെയും ഉത്തമ മാതൃകയാണെന്ന് അദ്ദേഹം പറഞ്ഞു. വ്യക്തിജീവിതം മുതൽ കുടുംബം, സമൂഹം, അയൽബന്ധങ്ങൾ, സഹജീവികളോടുള്ള ഇടപെടലുകൾ തുടങ്ങി എല്ലാ മേഖലകളിലും പ്രവാചകൻ മാതൃക കാണിച്ചുതന്നു. നബിയെ സ്നേഹിക്കുന്നതോടൊപ്പം അവിടുത്തെ ചര്യയും സ്വഭാവവും ജീവിതത്തിൽ പകർത്താൻ ഓരോരുത്തരും പരിശ്രമിക്കണം. നബിദിനാഘോഷങ്ങൾ പ്രവാചകചര്യ ജീവിതത്തിൽ പകർത്താനുള്ള പ്രചോദനമാകണമെന്നും അദ്ദേഹം കൂട്ടിച്ചേർത്തു.
പൊതുപ്രവർത്തകർ നബിയുടെ സേവന മാതൃക ഉൾക്കൊണ്ട് സമൂഹത്തിന്റെ നന്മയ്ക്കായി പ്രവർത്തിക്കണമെന്നും, ജനങ്ങളുടെ പ്രയാസങ്ങൾ മനസ്സിലാക്കി അവർക്കൊപ്പം നിൽക്കാനും സത്യസന്ധതയും വിനയവും ഉയർത്തിപ്പിടിക്കാനും അദ്ദേഹം ആഹ്വാനം ചെയ്തു.
ദുബൈ കെ.എം.സി.സി കാസർഗോഡ് ജില്ലാ കമ്മിറ്റി പ്രസിഡന്റ് സലാം കന്യപ്പാടി അധ്യക്ഷത വഹിച്ച ചടങ്ങിൽ ജില്ലാ ആക്ടിംഗ് സെക്രട്ടറി അഷ്റഫ് ബായാർ സ്വാഗതം പറഞ്ഞു. ദുബൈ കെ.എം.സി.സി ആക്ടിംഗ് സെക്രട്ടറി അഫ്സൽ മെത്തമ്മൽ ഉദ്ഘാടനം ചെയ്തു.
ദുബൈ കെ.എം.സി.സി സംസ്ഥാന സെക്രട്ടറി അഡ്വ. ഇബ്രാഹിം ഖലീൽ സിംസാറുൽ ഹഖ് ഹുദവിയെ ഷാൾ അണിയിച്ച് ആദരിച്ചു. ജില്ലാ കമ്മിറ്റിയുടെ സ്നേഹോപഹാരം ഡോ. അബൂബക്കർ കുറ്റിക്കോൽ സമ്മാനിച്ചു.
ദുബൈ കെ.എം.സി.സി ഭാരവാഹികളായ കെ.പി.എ. സലാം, റയീസ് തലശ്ശേരി, അഹമ്മദ് ബിച്ചി കോഴിക്കോട്, ഹനീഫ് ചെർക്കള, അഷ്റഫ് കൊടുങ്ങല്ലൂർ, ഹസൻ ചാലിൽ, വ്യവസായ പ്രമുഖരായ സ്പിക് അബ്ദുല്ല, സലാം ഹാജി വെൽഫിറ്റ്, റഷീദ് ബായാർ, ജില്ലാ ഭാരവാഹികൾ, മണ്ഡലം നേതാക്കൾ, എസ്.കെ.എസ്.എസ്.എഫ് പ്രതിനിധികൾ തുടങ്ങിയവർ പങ്കെടുത്തു.