ദോഹ – കേരളത്തിലെ റോഡ് കണ്ട് ന്യൂയോർക്കിൽ നിന്നും കേരളത്തിൽ എത്തിയ കുട്ടി പോലും അത്ഭുതപ്പെട്ടെന്ന് മുഖ്യമന്ത്രി പിണറായി വിജയൻ. ന്യൂയോർക്കിൽ താമസിക്കുന്ന ഒരു കുടുംബം കോട്ടയത്തിൽ എത്തുകയും അവർ പാലക്കാട് വരെ യാത്ര ചെയ്തപ്പോൾ കേരളത്തിലെ റോഡ് അത്ഭുതത്തോടെയാണ് കുട്ടി കണ്ടത്. പാലക്കാടേക്കുള്ള യാത്രയിൽ കുതിരാൻ ടണലിൽ കൂടിയുള്ള യാത്ര കുട്ടിയിൽ ആശ്ചര്യം ഉണ്ടാക്കിയതായും മുഖ്യമന്ത്രി പറഞ്ഞു .
ന്യൂയോർക്കിൽ പോലും ഇത്തരം റോഡുകൾ ഇല്ലെന്ന് കുട്ടി അച്ഛനോടും അമ്മയോടും പറഞ്ഞു. അത് പറയാൻ വേണ്ടിമാത്രം കുട്ടിയേയും കൂട്ടി അവർ എന്റെ അടുത്ത് വന്നതായും മുഖ്യമന്ത്രി ചൂണ്ടികാട്ടി . കേരളത്തിലെ റോഡിന്റെ ശോചനീയാവസ്ഥയെ കുറിച്ച് സദസ്സിൽ നിന്നും ഉയർന്ന ചോദ്യത്തോട് പ്രതികരിക്കുകയായിരുന്നു മുഖ്യമന്ത്രി. നാഷണൽ ഹൈവേയും, മലയോര ഹൈവേയും, തീരദേശ ഹൈവേയും പൂർത്തിയാകുന്നതോടു കൂടി റോഡുകളുടെ കാര്യത്തിൽ വലിയ മാറ്റം ഉണ്ടാവും. നമ്മുടെ ജലപാത രംഗത്തും വലിയ വികസനങ്ങളാണ് നടക്കുന്നത്. കോവളം മുതൽ ബേക്കൽ വരെ നീളുന്ന ജലപാത പ്രവർത്തി പുരോഗമിക്കുന്നതായും മുഖ്യമന്ത്രി കൂട്ടിചേർത്തു,