ദോഹ– കഴിഞ്ഞ ദിവസം സമാപിച്ച ദോഹ അജിയാൽ ഫിലിം ഫെസ്റ്റിവലിലെ ഹൃസ്വ ചലച്ചിത്ര വിഭാഗത്തിൽ മികച്ച ചിത്രത്തിനുള്ള പുരസ്‌കാരം നേടിയത് മലയാളി. എറണാകുളം സ്വദേശിനി വിനി ആൻ ബോസ് സംവിധാനം ചെയ്ത ‘സുലൈമാനി’ എന്ന ചിത്രമാണ് പുരസ്‌കാരം നേടിയത്. ആനിമേഷൻ ചലച്ചിത്ര സംവിധായകയായ ഇവർ ഫ്രാൻസിലാണ് സ്ഥിര താമസം.
20 മിനുറ്റ് ദൈർഘ്യമുള്ള സുലൈമാനി മലയാളം, ഫ്രഞ്ച് ഭാഷകളിലാണ് പുറത്തിറക്കിയത്. പ്രധാനമായും നീന,ആലിയ എന്ന രണ്ടു മലയാളി യുവതികളുടെയും ഇന്ത്യൻ റസ്റ്റോറന്റ് സുലൈമാനി നടത്തുന്ന മധ്യവയസ്കന്റെയും കഥ പറയുന്നതാണ് ഈ ചിത്രം. കുടുംബ പ്രതിസന്ധികൾക്കിടയിൽ ഫ്രാൻസിലേക്ക് അനധികൃത കുടിയേറ്റം നടത്തി പ്രായമായവരെ പരിചരിക്കുന്ന നീനയും സ്കോളർഷിപ്പോടെ പഠനത്തിന് ഫ്രാൻസിലേക്ക് വന്ന ആലിയയും ക്രിസ്മസ് രാത്രിയിൽ മെട്രോ ട്രെയിനിനകത്ത് അവിചാരിതമായി കണ്ടുമുട്ടുന്നു. തുടർന്ന് നീന ഒരു സാധനം ട്രെയിനനകത്ത് മറന്നു പോകുമ്പോൾ അത് തിരികെ ഏൽപ്പിക്കാൻ പോകുന്ന ആലിയയുടെ പിന്തുടരലാണ് ചിത്രത്തിലുള്ളത്.
ഇവരെ കൂടാതെ ചിത്രത്തിലെ കഥപാത്രങ്ങളായി റസ്റ്റോറന്റിലെ വെയിറ്ററും നീനയുടെ ഭർത്താവും രണ്ടു മക്കളും അമ്മയും ആലിയയുടെ ഉമ്മയും ഉപ്പയും മെട്രോ ട്രെയിനിലെ അസ്വാഭാവിക വ്യക്തിയും റസ്റ്റോറൻ്റിൽ പാർസൽ വാങ്ങാനെത്തുന്ന യുവാവുമെല്ലാം എത്തുന്നുണ്ട്.
പേര് പോലെ തന്നെ കേരളീയ ഭക്ഷണങ്ങളുടെ രുചികളാണ് സുലൈമാനി എന്നാ റസ്റ്റോറന്റിന്റെ പ്രത്യേകത. നിരവധി പേരുടെ ജീവിതങ്ങളും കാണിക്കുന്ന ഈ ഈ ചിത്രത്തിന്റെ തിരക്കഥ എഴുതിയത് വിന്നി ആൻ പാട്രീഷ്യ വാലെക്‌സും ചേർന്നാണ്. ആലിയ എന്ന കഥാപാത്രത്തിന് വിന്നി തന്നെയാണ് ശബ്ദം നൽകിയത്. കൂടാതെ എഡിറ്റിംഗും നിർവഹിച്ചിരിക്കുന്നത് വിന്നിയാണ്.
ഈ വർഷത്തെ ഇന്റർനാഷണൽ സൗത്ത് ഏഷ്യൻ ഫിലിം ഫെസ്റ്റിവലിൽ എക്സലൻസ് ഇൻ ഷോർട്ട് ഫിലിം മേക്കിംഗ് പുരസ്ക്കാരവും സുലൈമാനി കരസ്ഥമാക്കി. ഇന്റർനാഷണൽ ആനിമേറ്റഡ് ഫിലിം ഫെസ്റ്റിവലായ അനിമഡിബ 2025, സീസർ ചലച്ചിത്ര മേള 2026, അന്നസി ഫിലിം ഫെസ്റ്റിവൽ, ധർമശാല ഇൻ്റർനാഷണൽ ഫിലിം ഫെസ്റ്റിവൽ 2025 എന്നിവയിലെല്ലാം വിന്നിയുടെ ഈ ചിത്രം തെരഞ്ഞെടുക്കപ്പെട്ടിട്ടുണ്ട്.