മസ്കത്ത്– ഒമാനിലെ നിസ്വ – മസ്കത്ത് റോഡിലുണ്ടായ വാഹനാപകടത്തിൽ രണ്ട് ഏഷ്യൻ വംശജർ മരിച്ചു. അപകടത്തിൽ നിരവധി പേർക്ക് പരിക്കേറ്റിട്ടുണ്ട്. രണ്ട് ട്രക്കുകളും അഞ്ച് ചെറിയ വാഹനങ്ങളും ഉൾപ്പെടെ ഏഴ് വാഹനങ്ങളാണ് അപകടത്തിൽപ്പെട്ടത്. ഒരേ ദിശയിൽ സഞ്ചരിക്കുകയായിരുന്ന രണ്ട് ട്രക്കുകൾ തമ്മിൽ കൂട്ടിയിടിച്ചതാണ് അപകടത്തിന് തുടക്കമിട്ടത്. തുടർന്ന് പിന്നാലെ വന്ന അഞ്ച് കാറുകൾ ട്രക്കുകളിലേക്ക് ഇടിച്ചുകയറുകയായിരുന്നു.
മരിച്ചവരുടെ വിവരങ്ങൾ റോയൽ ഒമാൻ പോലീസ് ഇതുവരെ പുറത്തുവിട്ടിട്ടില്ല. അപകടത്തെ ത്തുടർന്ന് മേഖലയിൽ പോലീസ് ഗതാഗത നിയന്ത്രണം ഏർപ്പെടുത്തിയിട്ടുണ്ട്. വാഹനങ്ങൾ മറ്റ് വഴികളിലൂടെ തിരിച്ചുവിട്ടു. സ്ഥിതിഗതികൾ സാധാരണ നിലയിലാകുന്നത് വരെ ഈ നിയന്ത്രണങ്ങൾ തുടരുമെന്ന് പോലീസ് വ്യക്തമാക്കി. റോഡ് സുരക്ഷാ നിയമങ്ങൾ കർശനമായി പാലിക്കണമെന്നും സുരക്ഷാ കാര്യങ്ങളിൽ വിട്ടുവീഴ്ച ചെയ്യരുതെന്നും പോലീസ് യാത്രക്കാർക്ക് ജാഗ്രതാ നിർദ്ദേശം നൽകി.