പ്രതിരോധ- സുരക്ഷാ സഹകരണം; ഇന്ത്യ- സൗദി ചർച്ച സജീവം

റിയാദ്- സാമ്പത്തിക- സാമൂഹിക മേഖലക്ക് പുറമെ പ്രതിരോധ-സുരക്ഷാ മേഖലകളിൽ സഹകരണം മെച്ചപ്പെടുത്താനുള്ള ചർച്ച സജീവമാക്കി ഇന്ത്യയും സൗദി അറേബ്യയും. സൗദി അറേബ്യയിലെ ഇന്ത്യൻ അംബാസഡർ വിപുലും സൗദി പ്രതിരോധ സഹമന്ത്രി ഡോ. ഖാലിദ് ബിൻ ഹുസൈൻ അൽ ബിയാരിയും തമ്മിൽ റിയാദിൽ ഇതുസംബന്ധിച്ച് ഔദ്യോഗിക കൂടിക്കാഴ്ച നടത്തി. ഇന്ത്യയും സൗദി അറേബ്യയും തമ്മിലുള്ള പ്രതിരോധ മേഖലയിലെ സഹകരണം മെച്ചപ്പെടുത്തുന്നതിനെക്കുറിച്ച് ഇരു നേതാക്കളും സംസാരിച്ചു. ഇരു രാജ്യങ്ങളും തമ്മിലുള്ള സുപ്രധാനമായ നയതന്ത്ര ബന്ധങ്ങൾ കൂടുതൽ ഉയരങ്ങളിലേക്ക് എത്തിക്കുമെന്ന് അവർ പരസ്പരം ഉറപ്പുനൽകി.

അടുത്തിടെ ഇന്ത്യൻ വിദേശകാര്യ സഹമന്ത്രി കീർത്തി വർധൻ സിംഗ് സൗദി അറേബ്യയിൽ ഔദ്യോഗിക സന്ദർശനം നടത്തിയിരുന്നു. അതിന് തൊട്ടുപിന്നാലെയാണ് അംബാസഡർ തലത്തിലുള്ള പ്രധാന പ്രതിരോധ ചർച്ച നടന്നത്.