സാദിഖലി തങ്ങൾ അനുഗ്രഹിച്ച സ്ഥാനാർത്ഥി ഒന്നാം സ്ഥാനത്തെത്തി, മറ്റു ചിലർ അനുഗ്രഹിച്ചവർ മൂന്നാം സ്ഥാനത്ത്-ജിഫ്രി തങ്ങളെ ലക്ഷ്യമിട്ട് പി.എം.എ സലാം

കുവൈത്ത്- പാലക്കാട്, വയനാട് മണ്ഡലങ്ങളിലെ തെരഞ്ഞെടുപ്പ് ഫലവുമായി ബന്ധപ്പെട്ട് മുസ്ലിം ലീ​ഗ് സംസ്ഥാന ജനറൽ സെക്രട്ടറി പി.എം.എ സലാം നടത്തിയ പരാമർശം വിവാദമാകുന്നു. സമസ്ത പ്രസിഡന്റ് ജിഫ്രി മുത്തുക്കോയ തങ്ങളെ ലക്ഷ്യമിട്ടാണ് സലാമിന്റെ പ്രസ്താവന എന്നാണ് വിമർശനം.

മുസ്ലിം ലീഗ് സംസ്ഥാന അധ്യക്ഷൻ പാണക്കാട് സയ്യിദ് സാദിഖലി ശിഹാബ് തങ്ങൾ അനുഗ്രഹിച്ച സ്ഥാനാർത്ഥി ഒന്നാം സ്ഥാനത്ത് എത്തിയെന്നും മറ്റു ചിലർ അനുഗ്രഹിച്ച സ്ഥാനാർത്ഥി മൂന്നാം സ്ഥാനത്ത് എത്തിയെന്നും സലാം പറഞ്ഞു. ആരുടെ കൂടെയാണ് കേരളീയ മുസ്ലിം സമൂഹം എന്ന് വ്യക്തമായി അംഗീകരിക്കപ്പെട്ട സഹചര്യമാണ്. കേരളത്തിലെ മുസ്ലിം സമൂഹം അംഗീകരിക്കപ്പെട്ട പത്രം ഏതാണ് എന്ന് കൂടി തെരഞ്ഞെടുപ്പ് ഫലം തെളിയിച്ചതായും സലാം പറഞ്ഞു.