കുവൈത്ത് സിറ്റി – മുന്‍ എം.പി സ്വാലിഹ് ആശൂറിനെയും അദ്ദേഹത്തിന്റെ ഒരു സഹോദരനെയും സുരക്ഷാ വകുപ്പുകള്‍ അറസ്റ്റ് ചെയ്‌തെന്ന നിലക്ക് സോഷ്യല്‍ മീഡിയയില്‍ പ്രചരിക്കുന്ന റിപ്പോര്‍ട്ടുകള്‍ കുവൈത്ത് ആഭ്യന്തര മന്ത്രാലയം നിഷേധിച്ചു. ഈ റിപ്പോര്‍ട്ടുകള്‍ അടിസ്ഥാനരഹിതവും പൂര്‍ണ്ണമായും തെറ്റുമാണെന്ന് മന്ത്രാലയം വ്യക്തമാക്കി. ഔദ്യോഗികവും അംഗീകൃതവുമായ ഉറവിടങ്ങളില്‍ നിന്ന് വാര്‍ത്തകളും വിവരങ്ങളും നേടേണ്ടതിന്റെ പ്രാധാന്യം മന്ത്രാലയം ഊന്നിപ്പറഞ്ഞു. പൊതുജനാഭിപ്രായത്തെ തെറ്റിദ്ധരിപ്പിക്കുന്ന സ്ഥിരീകരിക്കാത്ത വാര്‍ത്തകള്‍ പ്രചരിപ്പിക്കുന്നതിനും പുനഃപ്രസിദ്ധീകരിക്കുന്നതിനും എതിരെ മന്ത്രാലയം മുന്നറിയിപ്പ് നല്‍കി. വാര്‍ത്തകള്‍ പങ്കിടുമ്പോള്‍ കൃത്യതയും ഉത്തരവാദിത്തവും പാലിക്കണമെന്നും പ്രസിദ്ധീകരിക്കുന്നതിനും വീണ്ടും പങ്കിടുന്നതിനും മുമ്പ് വിവരങ്ങള്‍ സ്ഥിരീകരിക്കാന്‍ ഔദ്യോഗികവും അംഗീകൃതവുമായ ചാനലുകളെ സമീപിക്കണമെന്നും ആഭ്യന്തര മന്ത്രാലയം സോഷ്യല്‍ മീഡിയ ഉപയോക്താക്കളോട് അഭ്യര്‍ഥിച്ചു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group