കുവൈത്ത് സിറ്റി – ടിക് ടോക്കിലെ തത്സമയ സംപ്രേക്ഷണത്തിനിടെ യു.എ.ഇയെ അപമാനിക്കുകയും അപകീര്‍ത്തിപ്പെടുത്തുകയും ചെയ്തതിന് കുറ്റക്കാരനാണെന്ന് കണ്ടെത്തിയതിനെ തുടര്‍ന്ന് കുവൈത്ത് കോടതി കുവൈത്തി പൗരനെ മൂന്ന് വര്‍ഷം കഠിനതടവിന് ശിക്ഷിച്ചതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ശിക്ഷ ഉടന്‍ നടപ്പാക്കും. പ്രക്ഷേപണത്തിന്റെ വീഡിയോ ക്ലിപ്പുകള്‍ ഓണ്‍ലൈനില്‍ പ്രചരിച്ചതിനെ തുടര്‍ന്ന് സുരക്ഷാ വകുപ്പുകള്‍ പ്രതിയെ കസ്റ്റഡിയിലെടുക്കുകയും സഹോദര രാഷ്ട്രത്തിനെതിരായ അധിക്ഷേപകരമായ പരാമര്‍ശങ്ങള്‍ക്കെതിരെ അന്വേഷണം ആരംഭിക്കുകയുമായിരുന്നു.
മറ്റ് രാജ്യങ്ങളെ അപമാനിക്കുന്നതും സഖ്യകക്ഷികളുമായുള്ള കുവൈത്തിന്റെ ബന്ധത്തിന് കോട്ടംതട്ടിക്കുന്നതും കുവൈത്ത് നിയമം കര്‍ശനമായി വിലക്കുന്നു. ആശയവിനിമയ പ്ലാറ്റ്ഫോമുകളുടെ ദുരുപയോഗം, ദേശീയ സുരക്ഷ, ക്രമസമാധാനം എന്നിവ നിയന്ത്രിക്കുന്ന ചട്ടങ്ങള്‍ പ്രകാരം അത്തരം പ്രവൃത്തികള്‍ ക്രിമിനല്‍ കുറ്റങ്ങളായി കണക്കാക്കപ്പെടുന്നു. ശിക്ഷിക്കപ്പെട്ട പ്രതിയുടെ പേരുവിവരങ്ങള്‍ അധികൃതര്‍ പുറത്തുവിട്ടിട്ടില്ല. എന്നാല്‍ ആശയവിനിമയ പ്ലാറ്റ്ഫോമുകളുടെ ദുരുപയോഗവും, ദേശീയ സുരക്ഷക്കും കുവൈത്തിന്റെ നയതന്ത്ര നിലപാടുകള്‍ക്കും ഭീഷണിയാകുന്ന പ്രവൃത്തികളും കുറ്റകരമാക്കുന്ന നിയമങ്ങള്‍ക്ക് കീഴില്‍ സംഭവം വരുന്നതായി അധികൃതര്‍ പറഞ്ഞു.