കുവൈറ്റ് സിറ്റി: മലപ്പുറത്ത്കാരെയും മുസ്ലിം ലീഗിനെയും പാകിസ്ഥാൻ അനുകൂലികളായി ചിത്രീകരിക്കും വിധം മുൻമന്ത്രിയും മുതിർന്ന സി.പി.എം നേതാവുമായ പാലോളി മുഹമ്മദ് കുട്ടിയുടെതായി വന്ന പ്രസ്താവന ഫാഷിഷ്സ്റ്റുകളെ സന്തോഷിപ്പിക്കുന്ന വിധമായിട്ടുണ്ടെന്ന് പ്രമുഖ ഇസ്ലാമിക പണ്ഡിതൻ ഡോ.ഹുസൈൻ മടവൂർ പറഞ്ഞു. സൗദിയിൽ നടന്ന ആഗോള അറബി ഭാഷാ സമ്മേളനത്തിൽ പങ്കെടുത്ത ശേഷം നാട്ടിലേക്കുള്ള യാത്രാമദ്ധ്യേ കുവൈത്തിൽ ഹുദാ സെന്റർ ഭാരവാഹികളോട് സംസാരിക്കുകയായിരുന്നു അദ്ദേഹം. വിഭജനാന്തരം ഇന്ത്യയോടൊപ്പം നിലയുറപ്പിക്കുകയും രാഷ്ട്ര പുനർനിർമ്മാണപ്രക്രിയയിൽ മുന്നിൽ നിന്ന് പ്രവർത്തിക്കുകയും ചെയ്യുന്ന ഇന്ത്യൻ മുസ്ലിംകളെ പാകിസ്ഥാൻ കൂറുള്ളവരായി പ്രചാരണം നടത്തുന്നത് ഫാസിസത്തിൻ്റെ ഭൂരിപക്ഷ പ്രീണനത്തിൻ്റെ ഭാഗമാണ്.
ലോകമെങ്ങും നടക്കുന്ന ഇസ്ലാമോഫോബിയയുടെ ഭാഗമാണ് ഇന്ത്യയിൽ നടക്കുന്ന ഇത്തരം ആരോപണങ്ങളും. സ്വാതന്ത്ര്യ സമര പോരാട്ടത്തിൽ സജീവമായതിൻ്റെ ഫലമായി ഏറ്റവും കൂടുതൽ സ്വത്തും ജീവനും നഷ്ടമായത് മുസ്ലിംകൾക്കാണ്. മലബാറുകാരും സ്വാതന്ത്ര്യത്തിന് വേണ്ടി പടപൊരുതിയവരാണ്. ഇ.എം എസ്സിനെ പോലത്തെ നേതാക്കൾ അത് എഴുതുകയും പറയുകയും ചെയ്തിട്ടുമുണ്ട്. വിഭജനാന്തരം പാകിസ്ഥാനിലേക്ക് പോവാതെ ജന്മനാടായ ഇന്ത്യയിൽ തന്നെ ജീവിക്കാൻ സ്വയം തീരുമാനിച്ച മുസ്ലിംകളുടെ ദേശക്കൂറ് ആരും ചോദ്യം ചെയ്യേണ്ടതില്ല. സമുദായങ്ങൾക്കിടയിൽ സംഘർഷവും വർഗ്ഗീയതയും സൃഷ്ടിക്കുന്നവരാണ് യഥാർത്ഥ രാജ്യദ്രോഹികൾ. ഭൂരിപക്ഷ വർഗ്ഗീയതയും ന്യൂനപക്ഷ വർഗ്ഗീയതയും എതിർക്കപ്പെടേണ്ടതാണെന്നും വർഗ്ഗീയതക്ക് മതമില്ലെന്നും അദ്ദേഹം പറഞ്ഞു.
ഫാഷിസത്തിന്നെതിരിൽ ശക്തമായ നിലപാടും പ്രവർത്തനങ്ങളുമായി പ്രവർത്തിച്ചു പോന്ന സി.പി.എം കളം മാറി ചവിട്ടുന്നത് സങ്കടകരമാണ്. ആദ്യമായി ഇന്ത്യാവിഭജനം ആവശ്യപ്പെട്ടത് പത്തൊമ്പതാം നൂറ്റാണ്ടിൻ്റെ അവസാനത്തിൽ ഹിന്ദുമഹാസഭയും പിന്നീട് ആർ എസ് എസ്സുമാണ്.
1906 ൽ രൂപീകൃതമായ സർവ്വേന്ത്യാ മുസ്ലിം ലീഗി നേത്രത്വത്തിൽ ഒരു മലയാളിയുമുണ്ടായിരുന്നില്ല..
സ്വതന്ത്ര ഇന്ത്യയിൽ രൂപീകൃതമായ ഇന്ത്യൻ യൂണിയൻ മുസ്ലിം ലീഗോ ഏതെങ്കിലും മുസ്ലിം സംഘടനകളോ നാളിതു വരെ പാകിസ്ഥാൻ അനുകൂല സമീപനം സ്വീകരിച്ചിട്ടുമില്ല. ബഹുമാന്യനായ പാലോളിക്ക് ഓർമ്മ പിശക് സംഭവിച്ചതാവാമെന്നും ഡോ. മടവൂർ പറഞ്ഞു.