കുവൈത്ത് സിറ്റി– അതിമാരക രാസലഹരിയായ മെത്താംഫെറ്റാമിനുമായി ഇന്ത്യന്‍ യുവാവ് കുവൈത്തിലെ ഹവലി ഗവര്‍ണറേറ്റ് സുരക്ഷാ ഉദ്യോഗസ്ഥരുടെ പിടിയിലായി. പ്രതിയുടെ പക്കല്‍ നിന്നും താമസസ്ഥലത്തു നിന്നുമായി ആകെ 52 പാക്കറ്റ് മയക്കുമരുന്ന് പിടിച്ചെടുത്തു.
കുവൈത്തിൽ വ്യാജമദ്യ നിർമ്മാണ സംഘം പിടിയിൽ; നാല് ഇന്ത്യക്കാർ ഉൾപ്പെടെ ഏഴുപേർ അറസ്റ്റിൽ
മിശ്‌റഫ് ഏരിയയില്‍ സംശയകരമായ സാഹചര്യത്തില്‍ മരങ്ങള്‍ക്കിടയില്‍ നില്‍ക്കുകയായിരുന്ന യുവാവിനെ കണ്ട പട്രോളിംഗ് പോലീസുകാര്‍ സമീപിക്കുകയായിരുന്നു. ഉദ്യോഗസ്ഥരെ കണ്ട് കയ്യിലുണ്ടായിരുന്ന ചെറിയ പ്ലാസ്റ്റിക് ബാഗ് പ്രതി വലിച്ചെറിഞ്ഞു. തുടര്‍ന്ന് കസ്റ്റഡിയിലെടുത്ത് നടത്തിയ ദേഹപരിശോധനയില്‍ 9 പാക്കറ്റ് ലഹരിമരുന്ന് കൂടി കണ്ടെത്തി.
തുടര്‍ന്ന് നടത്തിയ ചോദ്യം ചെയ്യലില്‍, ജാബ്‌രിയയിലെ താമസസ്ഥലത്ത് കൂടുതല്‍ മയക്കുമരുന്ന് ശേഖരമുണ്ടെന്ന് പ്രതി സമ്മതിച്ചു. മയക്കുമരുന്ന് പാക്കറ്റുകള്‍ മണ്ണില്‍ കുഴിച്ചിട്ട ശേഷം ഉപയോക്താക്കള്‍ക്ക് ഫോണ്‍ വഴി ലൊക്കേഷന്‍ അയച്ചുനല്‍കിയാണ് വിതരണം ചെയ്തിരുന്നതെന്നും യുവാവ് വെളിപ്പെടുത്തി. പ്രതിയുടെ താമസസ്ഥലത്തു നിന്ന് ബാക്കി ശേഖരം കൂടി പിടിച്ചെടുത്ത ശേഷം മേല്‍നടപടികള്‍ക്കായി തൊണ്ടിമുതല്‍ സഹിതം ബന്ധപ്പെട്ട വകുപ്പിന് കൈമാറിയതായി കുവൈത്ത് ആഭ്യന്തര മന്ത്രാലയം അറിയിച്ചു.
മയക്കുമരുന്ന് കടത്ത്: സ്വദേശികള്‍ക്ക് ജീവപര്യന്തം
മറ്റൊരു കേസില്‍, കടല്‍മാര്‍ഗ്ഗം കുവൈത്തിലേക്ക് മയക്കുമരുന്ന് കടത്തിയ രണ്ട് കുവൈത്തി പൗരന്മാര്‍ക്ക് ക്രിമിനല്‍ കോടതി ജീവപര്യന്തം തടവുശിക്ഷ വിധിച്ചു. ഇരുവര്‍ക്കും ഒരു ലക്ഷം കുവൈത്ത് ദീനാര്‍ വീതം പിഴയും ചുമത്തിയിട്ടുണ്ട്.
ഇതേ കേസില്‍ ഉള്‍പ്പെട്ട മറ്റൊരു കുവൈത്ത് പൗരനും പൗരത്വമില്ലാത്ത ‘ബിദൂന്‍’ വിഭാഗത്തില്‍പ്പെട്ട ഒരാള്‍ക്കും 15 വര്‍ഷം വീതം തടവും ഒരു ലക്ഷം ദീനാര്‍ വീതം പിഴയും കോടതി വിധിച്ചു. ജനറല്‍ ഡിപ്പാര്‍ട്ട്‌മെന്റ് ഫോര്‍ ഡ്രഗ്‌സ് കണ്‍ട്രോളും കോസ്റ്റ് ഗാര്‍ഡും സംയുക്തമായി നടത്തിയ ഓപ്പറേഷനിലാണ് ഇവര്‍ അറസ്റ്റിലായത്.