ജിദ്ദ – സൗദി അറേബ്യയിലെ സ്വകാര്യ മേഖലയിൽ മാർക്കറ്റിംഗ്, സെയിൽസ് തസ്തികകളിൽ ഉയർന്ന സൗദിവൽക്കരണം നടപ്പിലാക്കിത്തുടങ്ങിയതായി മാനവശേഷി സാമൂഹിക വികസന മന്ത്രാലയം അറിയിച്ചു. ഇതിനായി സ്ഥാപനങ്ങൾക്ക് അനുവദിച്ചിരുന്ന സാവകാശം (ഗ്രേസ് പിരീഡ്) അവസാനിച്ചതോടെ പുതിയ നിയമം നിലവിൽ വന്നു. രാജ്യത്തെ പൗരന്മാർക്ക് കൂടുതൽ തൊഴിലവസരങ്ങൾ ഉറപ്പാക്കുക എന്ന ലക്ഷ്യത്തോടെയാണ് ഈ മാറ്റങ്ങൾ കൊണ്ടുവന്നിരിക്കുന്നത്. പുതിയ നിയമപ്രകാരം, ഈ മേഖലകളിൽ ജോലി ചെയ്യുന്നവരിൽ 60 ശതമാനം പേരും സൗദി പൗരന്മാരായിരിക്കണം. മൂന്നോ അതിലധികമോ ജീവനക്കാരുള്ള സ്ഥാപനങ്ങൾക്കാണ് ഈ നിയമം ബാധകമാകുന്നത്.
മാർക്കറ്റിംഗ് മേഖലയിലുള്ളവർക്ക് സൗദിവൽക്കരണത്തിന്റെ ആനുകൂല്യം ലഭിക്കുന്നതിന് കുറഞ്ഞ വേതനം 5,500 റിയാലായി മന്ത്രാലയം നിശ്ചയിച്ചിട്ടുണ്ട്. മാർക്കറ്റിംഗ് മാനേജർ, പരസ്യ ഏജന്റ്, ഗ്രാഫിക് ഡിസൈനർ, പബ്ലിക് റിലേഷൻസ് സ്പെഷ്യലിസ്റ്റ്, ഫോട്ടോഗ്രാഫർ തുടങ്ങി പത്തോളം തസ്തികകൾ മാർക്കറ്റിംഗ് വിഭാഗത്തിൽ ഈ പരിധിയിൽ വരും. സെയിൽസ് വിഭാഗത്തിൽ സെയിൽസ് മാനേജർ, ഹോൾസെയിൽ-റീട്ടെയിൽ സെയിൽസ്മാൻമാർ, ഐ.ടി ഉപകരണങ്ങളുടെ സെയിൽസ് സ്പെഷ്യലിസ്റ്റ്, കൊമേഴ്സ്യൽ സ്പെഷ്യലിസ്റ്റ് ഉൾപ്പെടെയുള്ള വിവിധ ജോലികളിലും 60 ശതമാനം നിബന്ധന പാലിക്കേണ്ടതുണ്ട്. ലളിതമായി പറഞ്ഞാൽ, ഈ മേഖലകളിൽ പ്രവർത്തിക്കുന്ന കമ്പനികളിലെ പകുതിയിലധികം ജീവനക്കാരും ഇനി മുതൽ സ്വദേശികളായിരിക്കണം.