ഫ്ലൈ ദുബായ് യാത്രക്കാർക്ക് ദുബായ് പോലീസിന്റെ ഇസാദ് കാർഡിലൂടെ നിരവധി ഓഫറുകൾ

ദുബായ്- ഫ്ലൈ ദുബായ് എയർലൈൻ വഴി ദുബായിലേക്ക് എത്തുന്ന യാത്രക്കാർക്ക് ദുബായ് പോലീസിന്റെ ഇസാദ് കാർഡ് ആനുകൂല്യങ്ങൾ ലഭ്യമാക്കാൻ പുതിയ കരാർ ഒപ്പുവെച്ചു. ദുബായ് വേൾഡ് ട്രേഡ് സെന്ററിൽ നടന്ന അറേബ്യൻ ട്രാവൽ മാർക്കറ്റിൽ വെച്ച് ദുബായ് പോലീസും ഫ്ലൈ ദുബായും തമ്മിലാണ് ധാരണാപത്രം ഒപ്പുവെച്ചത്.
സാധാരണയായി യു.എ.ഇയിലെ സർക്കാർ ജീവനക്കാർക്കും ഗോൾഡൻ വിസക്കാർക്കും മറ്റും ലഭിക്കുന്ന ഇസാ കാർഡ് പുതിയ കരാറിലൂടെ ഫ്‌ലൈ ദുബായ് യാത്രക്കാർക്ക് പ്രത്യേക നിരക്കിൽ സ്വന്തമാക്കാനാകും. ഫ്ലൈ ദുബായ് വഴി ദുബായിലേക്ക് ടിക്കറ്റ് ബുക്ക് ചെയ്ത യാത്രക്കാർക്ക് ദുബായ് പോലീസിന്റെ ഔദ്യോഗിക Esaad Portal വഴിയോ അല്ലെങ്കിൽ Esaad’ മൊബൈൽ ആപ്പ് വഴിയോ ഡിജിറ്റലായി അപേക്ഷിക്കാം. ദുബായിൽ എത്തിയത് മുതൽ യാത്രക്കാർക്ക് ഈ കാർഡ് ഉപയോഗിച്ച് ഡിസ്‌കൗണ്ടുകൾ ലഭിക്കും.

അപേക്ഷ അംഗീകരിച്ചു കഴിഞ്ഞാൽ കാർഡ് പൂർണ്ണമായും ഡിജിറ്റൽ രൂപത്തിൽ മൊബൈൽ ആപ്പിൽ ലഭ്യമാകും. ദുബായിലെ വിവിധ ഔട്ട്‌ലെറ്റുകളിൽ ഈ ഡിജിറ്റൽ കാർഡോ അതിലെ ക്യു.ആർ കോഡോ കാണിച്ചാൽ ഇളവുകൾ ലഭിക്കും
ദുബായിലെയും യു.എ.ഇയിലെയും പ്രമുഖ ഹോട്ടലുകളിൽ താമസത്തിന് 50 ശതമാനം വരെ ഡിസ്‌കൗണ്ട്, പ്രശസ്തമായ കഫേകൾ, ഫൈൻ ഡൈനിംഗ് റസ്റ്റോറന്റുകൾ, ഫാസ്റ്റ് ഫുഡ് ചെയിനുകൾ എന്നിവയിൽ മികച്ച ഓഫറുകൾ, ദുബായിലെ പ്രശസ്തമായ തീം പാർക്കുകൾ, അമ്യൂസ്‌മെന്റ് സെന്ററുകൾ, മറ്റ് വിനോദ കേന്ദ്രങ്ങൾ എന്നിവയുടെ എൻട്രി ടിക്കറ്റുകളിൽ ഇളവുകൾ, വസ്ത്രങ്ങൾ, ഇലക്ട്രോണിക്‌സ്, മറ്റ് നിത്യോപയോഗ സാധനങ്ങൾ എന്നിവ വാങ്ങുമ്പോൾ പ്രത്യേക കിഴിവ്, തിരഞ്ഞെടുത്ത പ്രമുഖ ഓൺലൈൻ ഷോപ്പിംഗ് സൈറ്റുകളിലും ആപ്പുകളിലും പ്രത്യേക പ്രൊമോ കോഡുകൾ, ടൂർ പാക്കേജുകൾ, ദുബായ് സൈറ്റ്‌സീയിംഗ് എന്നിവ ബുക്ക് ചെയ്യുമ്പോൾ ഡിസ്‌കൗണ്ടുകൾ, ഫിറ്റ്‌നസ് സെന്ററുകൾ, ജിമ്മുകൾ, ഹെൽത്ത് ക്ലബ്ബുകൾ എന്നിവയിൽ ഇളവുകൾ, ദുബായിൽ വാഹനം വാടകയ്ക്കെടുക്കൽ, കാർ സർവീസ് തുടങ്ങിയവയ്ക്ക് പ്രത്യേക നിരക്കുകൾ എന്നിവയും ഇസാദ് കാർഡിലൂടെ ലഭ്യമാകും.