ബോട്ട് കേടായി കടലിൽ കുടുങ്ങിയ പ്രവാസികളെ രക്ഷിച്ചു

ജിദ്ദ– ബോട്ട് കേടായി നടുക്കടലിൽ കുടുങ്ങിയ രണ്ടു പ്രവാസികളെ രക്ഷപ്പെടുത്തി റെസ്‌ക്യൂ സംഘം. മക്ക പ്രവിശ്യയിലെ ഖുൻഫുദയിൽ അതിർത്തി സുരക്ഷാ സേനക്കു കീഴിലെ സെർച്ച് ആന്റ് റെസ്‌ക്യൂ സംഘമാണ് ഈജിപ്തുകാരായ രണ്ട് പേരെയാണ് രക്ഷപ്പെടുത്തിയത്. ഇവർക്ക് ആവശ്യമായ സഹായങ്ങൾ നൽകുകയും ബോട്ട് കരയിലേക്ക് വലിച്ചടുപ്പിക്കുകയും ചെയ്തു.

കടലിൽ ഇറങ്ങുന്നതിനു മുമ്പായി ബോട്ടുകളുടെ സുരക്ഷ ഉറപ്പുവരുത്തണമെന്നും സമുദ്ര സുരക്ഷാ മാർഗനിർദേശങ്ങൾ പാലിക്കണമെന്നും അതിർത്തി സുരക്ഷാ സേന ആവശ്യപ്പെട്ടു. അടിയന്തിര സാഹചര്യങ്ങളിൽ മക്ക, മദീന, കിഴക്കൻ പ്രവിശ്യകളിൽ 911 എന്ന നമ്പറിലും മറ്റു പ്രവിശ്യകളിൽ 994 എന്ന നമ്പറിലും ബന്ധപ്പെട്ട് സഹായം തേടാമെന്ന് അതിർത്തി സുരക്ഷാ സേന അറിയിച്ചു.