ദുബൈ– ഇലക്ട്രോണിക്‌സ് ട്രേഡിംഗ് കമ്പനിയില്‍ നിന്ന് അല്‍ബറാഹ പ്രദേശത്ത് ഡെലിവറി ചെയ്യാനായി കൊണ്ടുപോയപ്പോള്‍ മോഷ്ടിക്കപ്പെട്ട 20 മാക്ബുക്ക് പ്രോ ലാപ്ടോപ്പുകള്‍ ദുബൈ പൊലീസ് വീണ്ടെടുത്തു. ട്രേഡിംഗ് കമ്പനിയിലെ രണ്ട് ജീവനക്കാരില്‍ നിന്നാണ് നാലു പേര്‍ ചേര്‍ന്ന് ആസൂത്രിത നീക്കത്തിലൂടെ ലാപ്ടോപുകള് മോഷ്ടിച്ചത്. പ്രതികള്‍ ദുബൈ കുറ്റാന്വേഷണ കോടതിയുടെ വിചാരണ നേരിടുകയാണ്.
അല്‍ബറാഹയിലുള്ള ഒരു സ്ഥാപനത്തിലേക്കായിരുന്നു രണ്ട് ജീവനക്കാര്‍ ലാപ്‌ടോപുമായി എത്തിയത്. ഈ ഡെലിവറിയാണ് തങ്ങള്‍ പ്രതീക്ഷിക്കുന്നതെന്ന് അവകാശപ്പെട്ട് നാല് പേര്‍ അവരെ സമീപിച്ചു. പെട്ടെന്ന് അസ്വാഭാവികത തോന്നിയപ്പോഴേക്കും പ്രതികള്‍ ലാപ്ടോപുകള് തട്ടിയെടുത്ത് രണ്ട് ജീവനക്കാരെയും കസേരകളില്‍ കെട്ടിയിട്ട് സംഭവസ്ഥലത്ത് നിന്ന് ഓടി രക്ഷപ്പെടുകയായിരുന്നു. ഉടന്‍ ജീവനക്കാര്‍ ദുബൈ പോലീസിനെ അറിയിച്ചു. ഉടന്‍ തന്നെ സംഭവസ്ഥലത്ത് എത്തിയ പൊലീസ് ഉദ്യോഗസ്ഥര്‍ വിരലടയാളം എടുക്കുകയും സംശയിക്കുന്നവരെ തിരിച്ചറിയാന്‍ സിസിടിവി ദൃശ്യങ്ങള്‍ ഉള്‍പ്പെടെ പരിശോധിക്കുകയും ചെയ്തു.
കുറ്റവാളികളെ കണ്ടെത്താന്‍ തുടര്‍ന്ന് നടത്തിയ ശക്തമായ തിരച്ചിലിലാണ് സംശയിക്കുന്നവരില്‍ ഒരാള്‍ വലയിലായത്. പിന്നീട് മറ്റുള്ളവരെക്കൂടി അറസ്റ്റ് ചെയ്യുകയായിരുന്നു. ചോദ്യം ചെയ്യലില്‍ നാലുപേരും കവര്‍ച്ച നടത്തിയതായി സമ്മതിച്ചിട്ടുണ്ട്. പ്രതികള്‍ മോഷ്ടിച്ച 20 ലാപ്ടോപുകളും പോലീസിന് വീണ്ടെടുക്കാന്‍ കഴിഞ്ഞു. മറ്റൊരു ഇലക്ട്രോണിക്‌സ് കമ്പനിക്ക് കുറഞ്ഞ വിലയ്ക്ക് വില്‍ക്കാനായിരുന്നു പദ്ധതി.
അതേസമയം മറ്റൊരു കേസില്‍, വ്യാജ ജോലി പരസ്യം നല്‍കി യുവതിയുടെ ലാപ്ടോപ് മോഷ്ടിച്ച 35 വയസ്സുകാരനായ ഏഷ്യന്‍ വംശജന് ഒരു മാസം തടവും നാടുകടത്തലും കോടതി വിധിച്ചിട്ടുണ്ട്. സോഷ്യല്‍ മീഡിയയില്‍ പോസ്റ്റ് ചെയ്ത ജോലി പരസ്യം വ്യാജമാണെന്ന് തിരിച്ചറിയാതെ ഒരു സ്ത്രീ ഇയാളെ സമീപിക്കുകയായിരുന്നു. ജോലി ആവശ്യാര്‍ത്ഥം ലാപ്‌ടോപുമായി വരണമെന്നും ഒരു പ്രോഗ്രാം ഇന്‍സ്റ്റാള്‍ ചെയ്യാനുണ്ടെന്നും പ്രലോഭിപ്പിച്ച് സ്ത്രീയില്‍ നിന്ന് ലാപ്ടോപ് വാങ്ങി കടന്നുകളയുകയായിരുന്നു. പിന്നീട് മറ്റൊരു ഷോപ്പില്‍ വില്‍പ്പന നടത്തുകയും ചെയ്തു. പ്രതിയെ അറസ്റ്റ് ചെയ്തതിനെത്തുടര്‍ന്ന് മോഷ്ടിച്ച ലാപ്ടോപ് ദുബായ് പോലീസ് വീണ്ടെടുത്തു. ദുബൈ മിസ്ഡിമെനേഴ്സ് കോടതിയാണ് ഇയാളെ കുറ്റക്കാരനാണെന്ന് കണ്ടെത്തിത്. ജയില്‍ ശിക്ഷ പൂര്‍ത്തിയായ ശേഷം ഉടന്‍ നാടുകടത്താനും ഉത്തരവിട്ടു.