മക്ക– ലോകമെമ്പാടുമുള്ള തീർഥാടകർ ഒഴുകിയെത്തുന്ന വിശുദ്ധ മക്കയിൽ, ഹോട്ടലുകളിൽ നിന്ന് ഹറമിലേക്കും തിരിച്ചുമുള്ള യാത്രകൾക്ക് ബൈക്ക് ടാക്സികളും ഇലക്ട്രിക് സ്കൂട്ടറുകളും വൻ ജനപ്രീതി നേടുന്നു. ഹറമിൽ നിന്ന് മൂന്ന് കിലോമീറ്റർ വരെയുള്ള ഹ്രസ്വദൂര യാത്രകൾക്ക് കുറഞ്ഞ ചെലവിൽ സഞ്ചരിക്കാമെന്നത് തീർഥാടകർക്ക്, പ്രത്യേകിച്ച് പ്രായമായവർക്കും കാൽനടയാത്ര ബുദ്ധിമുട്ടുള്ളവർക്കും വലിയ ആശ്വാസമായി മാറുകയാണ്.
ഒരു യാത്രക്കാരനിൽ നിന്ന് 5 റിയാൽ മാത്രമാണ് ബൈക്ക് ടാക്സികൾ ഈടാക്കുന്നത്. ദൂരവും തിരക്കും അനുസരിച്ച് നിരക്ക് വ്യത്യാസപ്പെടുന്ന സാധാരണ ടാക്സികളുമായും ലിമോസിനുകളുമായും താരതമ്യം ചെയ്യുമ്പോൾ ഇത് വളരെ ലാഭകരമാണ്. കാൽനടയായും ബസുകളിലുമായിരുന്നു മുൻകാലങ്ങളിൽ തീർഥാടകർ പ്രധാനമായും യാത്ര ചെയ്തിരുന്നത്. എന്നാൽ സമയവും അധ്വാനവും ലാഭിക്കാമെന്നതിനാൽ മോട്ടോർ സൈക്കിളുകളെ ആശ്രയിക്കുന്നവരുടെ എണ്ണം വേഗത്തിൽ വർധിക്കുകയാണ്.
പ്രത്യേകിച്ച് നമസ്കാര സമയങ്ങളിലും ഉംറ കർമ്മങ്ങൾ പൂർത്തിയാക്കി മടങ്ങുമ്പോഴുമാണ് ബൈക്ക് ടാക്സികൾക്ക് ആവശ്യക്കാർ ഏറുന്നത്. പ്രായമായവർക്കും ദീർഘദൂര യാത്ര ചെയ്ത് ക്ഷീണിച്ചവർക്കും ഈ സേവനം അനുഗ്രഹമാകുന്നു. ഹറമിൽ ആളുകൾ കൂടുതലായെത്തുന്ന വ്യാഴം, വെള്ളി, ശനി ദിവസങ്ങളിൽ കേന്ദ്രീകരിച്ചാണ് ഭൂരിഭാഗം ഡ്രൈവർമാരും പ്രവർത്തിക്കുന്നത്. തദ്ദേശീയരായ ചെറുപ്പക്കാർക്ക് ഒരു അധിക വരുമാന മാർഗം കൂടിയാണ് ഈ രംഗം.
ചെലവ് കുറവാണെങ്കിലും, ഹറമിന് ചുറ്റുമുള്ള റോഡുകളിലെ വലിയ തിരക്ക് കണക്കിലെടുക്കുമ്പോൾ യാത്രക്കാരുടെ സുരക്ഷ ഉറപ്പാക്കുന്നതും ട്രാഫിക് നിയമങ്ങൾ പാലിക്കുന്നതും നിർണായകമാണ്. വിവിധ സാമ്പത്തിക പശ്ചാത്തലങ്ങളിൽ നിന്നുള്ള തീർഥാടകർക്ക് കുറഞ്ഞ ചെലവിൽ യാത്രാസൗകര്യം നൽകുന്ന ഇത്തരം പ്രാദേശിക ഗതാഗത സംവിധാനങ്ങൾക്ക് നിലവിൽ വലിയ സ്വീകാര്യതയാണ് മക്കയിൽ ലഭിക്കുന്നത്.