മനാമ– സല്‍മാനിയ ഗവണ്മെന്റ് ഹോസ്പിറ്റലില്‍ ഏറെക്കാലം ചികിത്സയിലായിരുന്ന കാസര്‍കോട് തൃക്കരിപ്പൂര്‍ സ്വദേശി ബഹ്റൈന്‍ ഇന്ത്യന്‍ എംബസിയുടെ സഹായത്തോടെ നാട്ടിലെത്തി. ഐസിആര്‍എഫ്, ഹോപ്പ് ബഹ്റൈന്‍, ബിഡികെ എന്നീ സംഘടനകളും സഹായ രംഗത്തുണ്ടായിരുന്നു. ബഹ്റൈനില്‍ മൂന്ന് വര്‍ഷം മുമ്പ് വിസിറ്റ് വിസയില്‍ എത്തിയ ഇദ്ദേഹം ജോബ് വിസയിലേക്ക് മാറാനുള്ള പ്രയാസം കാരണം നാട്ടിലേക്ക് പോകാന്‍ ഒരുങ്ങുന്നതിനിടെയാണ് ശ്വാസകോശ സംബന്ധമായ അസുഖം കാരണം സല്‍മാനിയ ആശുപത്രിയിൽ പ്രവേശിപ്പിച്ചത്.
ഐസിയുവിലും പിന്നീട് വാര്‍ഡിലുമായി ചികിത്സയില്‍ കഴിയവെ സഹായത്തിനുണ്ടായിരുന്ന സുഹൃത്ത് റഹീം വിവരങ്ങള്‍ മനസ്സിലാക്കി ഐസിആര്‍എഫ് ഹോസ്പിറ്റല്‍ കാര്യങ്ങളുടെ ചുമതലക്കാരനും ബിഡികെ ബഹ്റൈന്‍ ചെയര്‍മാനുമായ കെ. ടി. സലിം ഇദ്ദേഹത്തിന്റെ കുടുംബത്തെ ബന്ധപ്പെട്ടു. തുടര്‍ന്ന് കുടുംബത്തിന്റെ അപേക്ഷ പ്രകാരം ബഹ്റൈന്‍ ഇന്ത്യന്‍ എംബസി നാട്ടിലേക്ക് കൊണ്ട് പോകാനാവശ്യമായ നടപടികള്‍ സ്വീകരിക്കുകയുമായിരുന്നു. ഹോപ്പ് ബഹ്റൈന്‍ പ്രതിനിധികളായ ഷാജി മുത്തല, ഫൈസല്‍ പാട്ടാണ്ടി, സാബു ചിറമ്മല്‍, ഷാജി ഇളമ്പിലായി എന്നിവര്‍ ഹോസ്പിറ്റലിലും നാട്ടിലേക്ക് പോകുന്നതിനും സഹായങ്ങള്‍ നല്‍കി. കോഴിക്കോട് എയര്‍പോര്‍ട്ടില്‍ നിന്നും പയ്യന്നൂര്‍ സര്‍ക്കാര്‍ ആശുപത്രിയിലേക്ക് ബഹ്റൈന്‍ കേരളീയ സമാജം നോര്‍ക്ക ഹെല്പ് ഡസ്‌ക്ക് വഴി നോര്‍ക്ക ആംബുലന്‍സും ഏര്‍പ്പാടാക്കിയിരുന്നു.