കുവൈത്ത് സിറ്റി – കുവൈത്തിലെ വൈദ്യുതി, സമുദ്രജല ശുദ്ധീകരണ പ്ലാന്റിന് നേരെയുണ്ടായ ഇറാന് ആക്രമണത്തില് ഇന്ത്യന് തൊഴിലാളി കൊല്ലപ്പെട്ടതായി
വൈദ്യുതി, ജല, പുനരുപയോഗ ഊര്ജ മന്ത്രാലയം അറിയിച്ചു. ആക്രമണത്തില് പ്ലാന്റിലെ ഒരു സര്വീസ് കെട്ടിടത്തിന് കാര്യമായ നാശനഷ്ടമുണ്ടായി. വ്യോമപ്രതിരോധ സംവിധാനം തടഞ്ഞതിനെ തുടര്ന്ന് മിസൈല് അവശിഷ്ടങ്ങള് പതിച്ച് പവര് ഗ്രിഡിന്റെ ചില ഭാഗങ്ങള്ക്ക് കേടുപാടുകള് സംഭവിച്ചിട്ടുണ്ടെങ്കിലും കുവൈത്തിലെ വൈദ്യുതി, ജല സംവിധാനങ്ങള് സുസ്ഥിരവും നിയന്ത്രണത്തിലുമാണെന്നെന്ന് മന്ത്രാലയ വക്താവ് എന്ജിനീയര് ഫാത്തിമ ഹയാത്ത് പറഞ്ഞു. വിവിധ പ്രദേശങ്ങളിലെ ഏഴ് ഓവര്ഹെഡ് പവര് ട്രാന്സ്മിഷന് ലൈനുകള് അടുത്തിടെ മിസൈല് അവശിഷ്ടങ്ങള് പതിച്ച് തകര്ന്നു. സുരക്ഷാ വകുപ്പുകളുമായി ഏകോപിച്ച് 24 മണിക്കൂറിനുള്ളില് നാല് ലൈനുകള് നന്നാക്കി പുനഃസ്ഥാപിച്ചു. അടുത്ത ദിവസം രണ്ട് അധിക ലൈനുകള് കൂടി ശരിയാക്കി. ഇറാന് ആക്രമണം ആരംഭിച്ച ശേഷം ഇതുവരെ 22 ഓവര്ഹെഡ് ട്രാന്സ്മിഷന് ലൈനുകള്ക്കാണ് കേടുപാടുകള് സംഭവിച്ചത്. അതില് 20 എണ്ണം നന്നാക്കിയിട്ടുണ്ട്. ശേഷിക്കുന്ന രണ്ട് ലൈനുകളുടെ അറ്റകുറ്റപ്പണികള് പൂര്ത്തിയാക്കാനുള്ള പ്രവര്ത്തനങ്ങള് പുരോഗമിക്കുകയാണ്.
സുബിയ വൈദ്യുതി, സമുദ്രജല ശുദ്ധീകരണ പ്ലാന്റിലെ ഇന്ധന ടാങ്കിന് സമീപ ആഴ്ചകളില് സാരമായ കേടുപാടുകള് സംഭവിച്ചു. പ്രത്യേക സാങ്കേതിക സംഘങ്ങള് നിലവില് അറ്റകുറ്റപ്പണികള് നടത്തുന്നുണ്ട്. നാശനഷ്ടത്തിന്റെ വ്യാപ്തി കാരണം പുനഃസ്ഥാപനത്തിന് കൂടുതല് സമയമെടുക്കും. വൈദ്യുതിയും വെള്ളവും സംരക്ഷിക്കുന്നത് സിസ്റ്റം സുസ്ഥിരതയെ പിന്തുണക്കുകയും രാജ്യത്തുടനീളം വിശ്വസനീയമായ സേവനങ്ങള് നിലനിര്ത്താന് സഹായിക്കുകയും ചെയ്യുന്ന പങ്കിട്ട ഉത്തരവാദിത്തമാണ്. ജല, വൈദ്യുതി സംവിധാനത്തിന്റെ വിശ്വാസ്യത വര്ധിപ്പിക്കുന്നതിന് മന്ത്രാലയ ഉദ്യോഗസ്ഥര് പ്രൊഫഷണലിസത്തോടെ 24 മണിക്കൂറും പ്രവര്ത്തിക്കുന്നതായും എന്ജിനീയര് ഫാത്തിമ ഹയാത്ത് പറഞ്ഞു.