ജിദ്ദ: ഡയലോഗ്സ് ജിദ്ദ “ഫെമിനിച്ചി ഫാത്തിമ” സിനിമ ചർച്ചയും “ഗാലക്റ്റിക് ലവ്” എന്ന എഐ മ്യൂസിക് ആൽബത്തിന്റെ പോസ്റ്ററും പ്രകാശനം ചെയ്തു. മാനവികതയുടെ പ്രധാന മൂല്യമായ ജെൻഡർ സമത്വത്തെ മാറ്റിനിർത്തിയുള്ള നവോത്ഥാന ചർച്ചകൾ ആധുനിക കാലത്ത് അസാധ്യമാണെന്നും, സ്ത്രീ ശാക്തീകരണം ഓരോരുത്തരുടെയും വ്യക്തിപരമായ ഇടപെടലുകളിൽ നിന്നാണ് ആരംഭിക്കേണ്ടതെന്നും ചർച്ചയിൽ പങ്കെടുത്തവർ ചൂണ്ടിക്കാട്ടി. അടിച്ചമർത്തപ്പെടുന്ന സ്ത്രീകളുടെ ഉന്നമനത്തിനായി മാനവിക മൂല്യങ്ങളിൽ അധിഷ്ഠിതമായ സാമൂഹിക മാറ്റം അനിവാര്യമാണെന്നും ചർച്ച വിലയിരുത്തി.
സിനിമയിലെ പുതിയ സാങ്കേതിക വിദ്യയായ ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് അലി അരീക്കത്ത് സംവിധാനം നിർവഹിച്ച “ഗാലക്റ്റിക് ലവ്” എന്ന എഐ മ്യൂസിക് ആൽബത്തിന്റെ പോസ്റ്റർ ചടങ്ങിൽ പ്രകാശനം ചെയ്തു. റിയാസ് മുണ്ടേങ്ങര എഐ മാസ്റ്ററിംഗ് നിർവഹിച്ച ആൽബത്തിന്റെ പോസ്റ്റർ ഹംസ മദാരി, കബീർ കൊണ്ടോട്ടിക്ക് നൽകിയാണ് പ്രകാശിപ്പിച്ചത്.
റുവൈസിലെ എൻ കഫേർട്ട് ഹാളിൽ നടന്ന പരിപാടിയിൽ നസീർ വാവക്കുഞ്ഞ്, ഉണ്ണി തെക്കേടത്ത്, റഫീഖ് പത്തനാപുരം, ബഷീർ പരുത്തികുന്നൻ, കബീർ കൊണ്ടോട്ടി, സന്തോഷ് കലക്കാട്ടിൽ, ശ്രീത അനിൽ, അഡ്വ. ശംസുദ്ധീൻ, നാസർ വേങ്ങര, അഫ്സൽ, സോഫിയ സുനിൽ എന്നിവർ ചർച്ചയിൽ പങ്കെടുത്തു. അലി അരീക്കത്ത്, അസ്സൈൻ ഇല്ലിക്കൽ, ഹംസ മദാരി, അദ്നു ഷബീർ, ഷാജു അത്താണിക്കൽ, സുനിത എന്നിവർ പരിപാടി നിയന്ത്രിച്ചു.