ദമാം – ദമാം കിംഗ് ഫഹദ് അന്താരാഷ്ട്ര വിമാനത്താവളത്തിലെ വിവിധ ഭാഗങ്ങളില്‍ വൈദ്യുതി സ്തംഭിച്ചത് യാത്രക്കാരെയും ജീവനക്കാരെയും ഒരുപോലെ ദുരിതത്തിലാക്കി. വൈദ്യുതി സ്തംഭനം യാത്രക്കാരുടെ നടപടിക്രമങ്ങളെ ബാധിച്ചു. ചില അവശ്യ സേവനങ്ങള്‍ തടസ്സപ്പെട്ടു. പ്രധാന സംവിധാനങ്ങളുടെ പ്രവര്‍ത്തനം തടസ്സപ്പെട്ടില്ലെങ്കിലും വൈദ്യുതി സ്തംഭനം ജീവനക്കാരില്‍ അധിക സമ്മര്‍ദം ചെലുത്തി.
യാത്രക്കാരുടെ ആഗമന, നിര്‍ഗമന ഏരിയകളിലാണ് വൈദ്യുതി തടസ്സം പ്രധാനമായും നേരിട്ടത്. ഇതേ തുടര്‍ന്ന് ബദല്‍ പ്രവര്‍ത്തന നടപടിക്രമങ്ങള്‍ സ്വീകരിക്കേണ്ടി വന്നു. അന്താരാഷ്ട്ര ആഗമന ഹാളിലാണ് വൈദ്യുതി മുടക്കം ഏറ്റവും കൂടുതല്‍ ബാധിച്ച പ്രദേശങ്ങളിലൊന്നാണ്. ബാഗേജ് ക്ലെയിം ഏരിയയിലേക്ക് നയിക്കുന്ന അന്താരാഷ്ട്ര ടെര്‍മിനലിന്റെ പ്രവേശന കവാടത്തില്‍ ഹാന്‍ഡ് ലഗേജ് പരിശോധനാ ഉപകരണങ്ങള്‍ പ്രവര്‍ത്തനരഹിതമായി. കസ്റ്റംസില്‍ വലിയ ബാഗുകള്‍ക്കായി നിയുക്തമാക്കിയിരിക്കുന്ന ഉപകരണങ്ങളിലേക്ക് ഹാന്‍ഡ് ബാഗുകളുടെ പരിശോധന തിരിച്ചുവിടാന്‍ ഇത് ബന്ധപ്പെട്ട അധികൃതരെ നിര്‍ബന്ധിതരാക്കി. ഇത് ജീവനക്കാര്‍ക്ക് അധിക ഭാരം സൃഷ്ടിക്കാനും യാത്രക്കാര്‍ക്കുള്ള കാത്തിരിപ്പ് സമയം വര്‍ധിക്കാനും കാരണമായി.
വൈദ്യുതി തടസ്സം പുറം ഡിപ്പാര്‍ച്ചര്‍ ഹാളിലേക്കും വ്യാപിച്ചു. എസ്‌കലേറ്ററുകള്‍ പ്രവര്‍ത്തനരഹിതമായത് യാത്രക്കാര്‍ക്ക്, പ്രത്യേകിച്ച് പ്രായമായവര്‍ക്കും ഭാരമേറിയ ലഗേജുള്ളവര്‍ക്കും ചില ബുദ്ധിമുട്ടുകള്‍ സൃഷ്ടിച്ചു. പെട്ടെന്നുള്ള വൈദ്യുതി സ്തംഭനത്തിന്റെ കാരണങ്ങളോ വൈദ്യുതി പുനഃസ്ഥാപിക്കാനും സേവനങ്ങള്‍ പൂര്‍ണ തോതില്‍ സാധാരണ നിലയിലാകാനും പ്രതീക്ഷിക്കുന്ന സമയപരിധിയോ വ്യക്തമാക്കി വിമാനത്താവള അധികൃതരില്‍ നിന്ന് ഔദ്യോഗിക വിവരങ്ങളൊന്നും ലഭിച്ചിട്ടില്ല. തകരാറ് വേഗത്തില്‍ പരിഹരിക്കപ്പെടുമെന്ന് യാത്രക്കാരും വിമാനത്താവള ജീവനക്കാരും പ്രതീക്ഷിക്കുന്നു.