വിയന്ന– ഓസ്ട്രിയ ഗ്രാസ് നഗരത്തിലെ സ്‌കൂളില്‍ വിദ്യാര്‍ത്ഥി വെടിവെച്ച് കൊലപ്പെടുത്തിയത് 10 പേരെ. വെടിവെപ്പിന് ശേഷം സ്വയം വെടിയുതിര്‍ത്ത് ആത്മഹത്യ ചെയ്യുകയും ചെയ്തു. വിദ്യാര്‍ത്ഥികളും അധ്യാപകരുമുള്‍പ്പെടെ അനവധി പേര്‍ക്ക് പരുക്കേറ്റതായും വിവരമുണ്ട്. മരിച്ചവരില്‍ ഒരു മുതിര്‍ന്നയാളെങ്കിലുമുണ്ടാവാമെന്ന് മേയര്‍ എല്‍കെ കാഹര്‍ ഓസ്ട്രിയന്‍ പ്രസ്സ് ഏജന്‍സിയോട് വ്യക്തമാക്കിയതായി ഫ്രാന്‍സ് 24 റിപ്പോര്‍ട്ട് ചെയ്തു.
ഓസ്ട്രിയന്‍ പ്രാദേശിക സമയം കാലത്ത് പത്ത് മണിയോടെ സ്‌കൂളിലെ ശുചിമുറിയിലായിരുന്നു വെടിവെപ്പ് എന്ന് അന്താരാഷ്ട്രാ മാധ്യമങ്ങള്‍ റിപ്പോര്‍ട്ട് ചെയ്തു. സ്‌കൂള്‍ കെട്ടിടത്തിനുള്ളില്‍ നിന്ന് കാലത്ത് വെടിയൊച്ച കേട്ടതായി പൊലീസ് പറഞ്ഞു. പ്രത്യേക പൊലീസ് സേനയും അടിയന്തിര സേവനങ്ങളലും സംഭവസ്ഥലത്ത് ഉടന്‍ എത്തിയതായി പൊലീസ് വക്താവ് സാബ്രി യോര്‍ഗണ്‍ അറിയിച്ചു. മരണസംഖ്യ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. പൊതുജനങ്ങളോടും വിദ്യാര്‍ത്ഥികളോടും അധ്യാപകരോടും പ്രദേശത്ത് നിന്ന് മാറിനില്‍ക്കാനും അധികൃതരുടെ നിര്‍ദ്ദേശങ്ങള്‍ പാലിക്കാനും പൊലീസ് അറിയിച്ചിട്ടുണ്ട്.
അമേരിക്കന്‍ രാജ്യങ്ങളിലുള്ളത് പോലെ വിദ്യാലയങ്ങളിലെ വെടിവെപ്പ് യൂറോപ്പില്‍ നേരത്തെ അസാധാരണമായിരുന്നുവെങ്കിലും കഴിഞ്ഞ കുറച്ചുവര്‍ഷങ്ങളായി സ്‌കൂളുകളിലും സര്‍വ്വകലാശാലകളിലും ഇത് വര്‍ധിച്ചുവരികയാണെന്നും ഫ്രാന്‍സ് 24 വ്യക്തമാക്കുന്നു.