വാഷിംഗ്ടണ് – ഇറാന്-ഇസ്രായില്, അമേരിക്കന് യുദ്ധം മൂന്നാം ആഴ്ചയിലേക്ക് കടക്കുകയും ആവശ്യമുള്ളിടത്തോളം കാലം സംഘര്ഷം തുടരുമെന്ന് യു.എസ് പ്രസിഡന്റ് ഡൊണാള്ഡ് ട്രംപ് ഭീഷണി മുഴക്കുകയും ചെയ്തതിനിടെ, അമേരിക്ക വിജയം പ്രഖ്യാപിച്ച് യുദ്ധത്തില് നിന്ന് പിന്മാറണമെന്ന് ക്രിപ്റ്റോകറന്സികളെയും കൃത്രിമബുദ്ധിയെയും കുറിച്ചുള്ള വൈറ്റ് ഹൗസ് ഉപദേഷ്ടാവായ ഡേവിഡ് സാക്സ്. വിജയം പ്രഖ്യാപിക്കാനും യുദ്ധത്തില് നിന്ന് പിന്മാറാനുമുള്ള ശരിയായ സമയമാണിതെന്ന് ഡേവിഡ് സാക്സ് കൂട്ടിച്ചേര്ത്തു. അമേരിക്ക ഇറാന്റെ സൈനിക ശേഷി ദുര്ബലപ്പെടുത്തി. യുദ്ധത്തില് നിന്ന് പിന്മാറാന് നമ്മള് ഒരു വഴി കണ്ടെത്താന് ശ്രമിക്കണം. സംഘര്ഷം മൂര്ഛിപ്പിക്കുന്നത് ഒരു തരത്തിലും ഗുണപരമായ ഫലങ്ങള് നല്കുന്നില്ലെങ്കില്, തീവ്രത കുറക്കാനുള്ള മാര്ഗം പരിഗണിക്കണം. തീവ്രത കുറക്കുന്നതില് ഏതെങ്കിലും തരത്തിലുള്ള വെടിനിര്ത്തല് കരാറിലെത്തുന്നതും ഇറാനുമായി ചര്ച്ചയിലൂടെ ഒത്തുതീര്പ്പ് നടത്തുന്നതും ഉള്പ്പെടുന്നുവെന്ന് ഞാന് കരുതുന്നുവെന്ന് ഡേവിഡ് സാക്സ് പറഞ്ഞു.
ഇറാനുമായുള്ള യുദ്ധം എന്നെന്നേക്കും തുടരാന് അമേരിക്കക്ക് കഴിയുമെന്ന് നേരത്തെ ട്രംപ് പറഞ്ഞിരുന്നു. ഇതിനു പിന്നാലെയാണ് പ്രമുഖ നിക്ഷേപകനും യു.എസ് ഭരണകൂടത്തിന്റെ എ.ഐ നയത്തിന് നേതൃത്വം നല്കുന്ന ഉദ്യോഗസ്ഥനുമായ ഡേവിഡ് സാക്സ് യുദ്ധം അവസാനിപ്പിക്കാന് ആഹ്വാനം ചെയ്യുന്ന പ്രസ്താവന നടത്തിയത്. യുദ്ധത്തില് ഇറാന് കനത്ത പരാജയം ഏറ്റുവാങ്ങിയെന്നും വെടിനിര്ത്തല് കരാര് തേടുകയാണെന്നും എന്നാല് താന് അത് നിരാകരിക്കുകയാണെന്നും ട്രംപ് പറഞ്ഞു.
യുദ്ധത്തിന്റെ ഫലത്തെ സ്വാധീനിക്കാന് ട്രംപിന്റെ വൈറ്റ് ഹൗസ് ഉപദേഷ്ടാക്കള്ക്കിടയില് അധികാര പോരാട്ടം നടക്കുന്നുണ്ടെന്ന് അമേരിക്കന് വൃത്തങ്ങള് റിപ്പോര്ട്ട് ചെയ്തു. വൈറ്റ് ഹൗസ് ചീഫ് ഓഫ് സ്റ്റാഫ് സൂസി വെല്സും അവരുടെ ഡെപ്യൂട്ടി ജെയിംസ് ബ്ലെയറും ഉള്പ്പെടെയുള്ള രാഷ്ട്രീയ ഉപദേഷ്ടാക്കള് വിജയത്തിന്റെ പ്രാധാന്യം കുറച്ചുകാണാന് ട്രംപിനോട് ആവശ്യപ്പെട്ടതായി സ്രോതസ്സുകള് വിശദീകരിച്ചു. ഇത് സൈനിക നടപടി പരിമിതമാണെന്നും അതിന്റെ അവസാനത്തോട് അടുക്കുന്നുവെന്നും സൂചിപ്പിക്കുന്നു. എന്നാല്, ചില കടുത്ത വാദികള് ഇറാനെതിരായ ആക്രമണം തുടരാന് യു.എസ് പ്രസിഡന്റിനു മേല് സമ്മര്ദം ചെലുത്തുന്നതായി റോയിട്ടേഴ്സ് റിപ്പോര്ട്ട് ചെയ്തു. യുദ്ധത്തിന്റെ പ്രത്യാഘാതങ്ങളെ കുറിച്ചുള്ള അന്താരാഷ്ട്ര ആശങ്കകള് വര്ധിക്കുന്നതിനിടെ, യുദ്ധം മൂന്ന് ആഴ്ച കൂടി നീണ്ടുനില്ക്കുമെന്ന് ചില അമേരിക്കന്, ഇസ്രായില് വൃത്തങ്ങള് സൂചിപ്പിച്ചു.