വാഷിംഗ്ടണ്– ഇറാനുമായുള്ള ചർച്ചകളിൽ നേരിയ പുരോഗതിയുണ്ടെന്ന് യു.എസ് സ്റ്റേറ്റ് സെക്രട്ടറി മാർക്കോ റൂബിയോ അറിയിച്ചു. എന്നാൽ ഇറാൻ ആണവായുധം സ്വന്തമാക്കുന്നത് തടയുക എന്ന കാര്യത്തിൽ അമേരിക്കൻ നിലപാടിൽ മാറ്റമില്ലെന്ന് അദ്ദേഹം വ്യക്തമാക്കി. ഇറാന്റെ പക്കലുള്ള ഉയർന്ന തോതിൽ സമ്പുഷ്ടീകരിച്ച യുറേനിയം ശേഖരത്തെക്കുറിച്ചും ഭാവിയിലെ സമ്പുഷ്ടീകരണ നയങ്ങളെക്കുറിച്ചും കൃത്യമായ വ്യവസ്ഥകൾ ഭാവിയിലെ ഏതൊരു കരാറിലും ഉൾപ്പെടുത്തണമെന്നാണ് അമേരിക്കയുടെ ആവശ്യം. കൂടാതെ ഹോർമുസ് കടലിടുക്കിൽ ടോളോ മറ്റ് നിയന്ത്രണങ്ങളോ ഏർപ്പെടുത്താനുള്ള ഇറാന്റെ നീക്കങ്ങളെ അമേരിക്ക ശക്തമായി എതിർക്കുന്നുവെന്നും, ഇത്തരം നടപടികൾ ഒരുതരത്തിലും അംഗീകരിക്കാൻ കഴിയില്ലെന്നും റൂബിയോ ആവർത്തിച്ചു.
അതേസമയം ചർച്ചകൾ വിജയത്തിലേക്ക് അടുക്കുകയാണെന്ന റിപ്പോർട്ടുകൾ ഇറാൻ വിദേശകാര്യ മന്ത്രാലയം നിഷേധിച്ചു. ആണവ പദ്ധതിയുമായി ബന്ധപ്പെട്ട തർക്കങ്ങൾ പിന്നീടുള്ള ഘട്ടത്തിലേക്ക് മാറ്റിവെക്കാനാണ് നിലവിലെ തീരുമാനം. ഇപ്പോൾ യുദ്ധം അവസാനിപ്പിക്കുന്നതിലും ഹോർമുസ് കടലിടുക്കിലൂടെയുള്ള അന്താരാഷ്ട്ര സമുദ്ര ഗതാഗതത്തിന്റെ സുരക്ഷ ഉറപ്പാക്കുന്നതിലുമാണ് ചർച്ചകൾ പ്രധാനമായും ശ്രദ്ധ കേന്ദ്രീകരിക്കുന്നത്.
