ടെക്സസ്– രണ്ട് യുവതികളെ വേശ്യാവൃത്തിക്കായി നിർബന്ധിച്ച കേസിൽ ഒരാൾ അറസ്റ്റിലായി. വേശ്യാവൃത്തിക്കായി ഇവരെ പ്രതി ഹൂസ്റ്റണിൽ നിന്ന് റൗണ്ട് റോക്കിലേക്ക് കൊണ്ടുവന്നതിനെ തുടർന്നാണ് അറസ്റ്റിലായത് . നവംബർ 26-ന് റൗണ്ട് റോക്കിലെ ഒരു വീട്ടിൽ മനുഷ്യക്കടത്തിന് സാധ്യതയുണ്ടെന്ന് പോലീസിന് രഹസ്യവിവരം ലഭിച്ചു. ഒരു ബന്ധുവിനെ നിർബന്ധിച്ച് ലൈംഗികവൃത്തിയിൽ ഏർപ്പെടുത്തുകയാണെന്നും പുറത്തുപോകാൻ അനുവദിക്കുന്നില്ലെന്നും കോൾ ചെയ്തയാൾ പോലീസിനെ അറിയിക്കുകയായിരുന്നു.
തുടർന്ന് സ്ഥലത്തെത്തിയ പോലീസ് 39 വയസ്സുള്ള ബ്രാൻഡൻ വില്യംസിനെയും ഹൂസ്റ്റൺ സ്വദേശികളായ 20 വയസ്സുള്ള രണ്ട് യുവതികളെയും കണ്ടെത്തി. വേശ്യാവൃത്തിക്കായി വില്യംസ് തങ്ങളെ ഹൂസ്റ്റണിൽ നിന്ന് കൊണ്ടുവന്നതാണെന്നും പോകാൻ അനുവദിക്കുന്നില്ലെന്നും യുവതികളിൽ ഒരാൾ പോലീസിനോട് പറഞ്ഞു. വില്യംസിന്റെ കൈവശം തോക്കും കണ്ടെത്തി. നിർബന്ധിത വേശ്യാവൃത്തി ചുമത്തി വില്യംസിനെ പോലീസ് അറസ്റ്റ് ചെയ്തു. രക്ഷപ്പെടുത്തിയ യുവതികൾക്ക് ആവശ്യമായ പിന്തുണയും സഹായങ്ങളും പോലീസ് നൽകി വരുന്നു.
മനുഷ്യക്കടത്തുമായി ബന്ധപ്പെട്ട സഹായങ്ങൾക്കോ വിവരങ്ങൾക്കോ വേണ്ടി നാഷണൽ ഹ്യൂമൻ ട്രാഫിക്കിംഗ് ഹോട്ട്‌ലൈനിൽ 888-373-7888 എന്ന നമ്പറിൽ ബന്ധപ്പെടാവുന്നതാണ്.