ബെയ്‌റൂട്ട്– ഇസ്രായിൽ ബെയ്‌റൂട്ടിൽ നടത്തിയ വ്യോമാക്രമണത്തിനിടെ ലക്ഷ്യത്തിലെത്താതെ പൊട്ടാതെ അവശേഷിച്ച ബോംബ് തിരികെ നൽകണമെന്ന് ആവശ്യപ്പെട്ട് അമേരിക്ക ലെബനൻ അധികൃതരെ സമീപിച്ചു. യു.എസിന്റെ അത്യാധുനിക പ്രതിരോധ സാങ്കേതികവിദ്യ ചോരാതിരിക്കാനുള്ള കടുത്ത ആശങ്കയാണ് നയതന്ത്ര നീക്കത്തിന് പിന്നിൽ.
നവംബർ 23-ന് ബെയ്‌റൂട്ടിലെ ഹറത്ത് ഹ്രൈക് ജില്ലയിൽ, ഹിസ്ബുല്ല കമാൻഡറെ ലക്ഷ്യമിട്ട് ഇസ്രായിൽ നടത്തിയ ആക്രമണത്തിൽ വർഷിച്ച എട്ട് ബോംബുകളിൽ ഏഴെണ്ണം പൊട്ടിത്തെറിച്ചപ്പോൾ, ഒരെണ്ണം കേടുപാടുകൾ കൂടാതെ അവശേഷിക്കുകയായിരുന്നു. ഹിസ്ബുല്ലയുടെ ശക്തമായ സ്വാധീന മേഖലയിൽ നിന്നാണ് ഈ ബോംബ് കണ്ടെത്തിയതെന്നാണ് റിപ്പോർട്ടുകൾ.
ജിബി‌യു 39 ബി എന്ന അത്യാധുനിക ബോംബാണിത്. ബോയിങ് കമ്പനി നിർമ്മിക്കുന്ന ഈ ബോംബിന്റെ പ്രത്യേകത അതിന്റെ കൃത്യതയാണ്. ജിപിഎസ് സഹായത്തോടെ പ്രവർത്തിക്കുന്ന ഇതിന്റെ സാങ്കേതികവിദ്യ അതീവ രഹസ്യമാണ്.
സാങ്കേതികവിദ്യ ചോരുമോ എന്ന ഭയമാണ് അമേരിക്കയുടെ ഈ നീക്കത്തിന് കാരണം. ആയുധം റഷ്യയുടെയോ, ചൈനയുടെയോ, ഇറാന്റെയോ കൈവശം കിട്ടിയാൽ റിവേഴ്സ് എഞ്ചിനീയറിംഗ്’ വഴി വിശകലനം ചെയ്യാനും സമാനമായ ആയുധങ്ങൾ നിർമ്മിക്കാനും സാധ്യതയുണ്ട്. ഇത് അമേരിക്കയുടെ സുരക്ഷാ രഹസ്യങ്ങൾക്ക് വലിയ ഭീഷണിയാകുമെന്നാണ് കണക്കുകൂട്ടൽ.
യു.എസ്. ഇതിനകം ലെബനനെ സമീപിച്ചിട്ടുണ്ട്. എന്നാൽ ലെബനൻ അധികൃതർ ഇതുവരെ ഔദ്യോഗികമായി പ്രതികരിച്ചിട്ടില്ല. ബോംബ് കണ്ടെടുത്തത് ഹിസ്ബുല്ലയുടെ ശക്തികേന്ദ്രത്തിൽ നിന്നായതിനാൽ നിലവിൽ ഹിസ്ബുല്ലയുടെ കൈകളിൽ എത്തിയിരിക്കാനുള്ള സാധ്യത അമേരിക്കൻ രഹസ്യാന്വേഷണ വിഭാഗങ്ങളെ ആശങ്കപ്പെടുത്തുന്നുണ്ട്. വെടിനിർത്തൽ നിലനിൽക്കുന്ന സാഹചര്യത്തിലും ഇത് ഒരു പുതിയ നയതന്ത്ര പ്രതിസന്ധിക്ക് തിരികൊളുത്തിയിരിക്കുകയാണ്.