വാഷിംഗ്ടൺ- യുദ്ധം അവസാനിപ്പിക്കാനായി അമേരിക്ക മുന്നോട്ടുവെച്ച നിർദ്ദേശങ്ങളോടുള്ള ഇറാന്റെ പ്രതികരണം തികച്ചും മണ്ടത്തരവും പരിഹാസ്യവുമാണെന്ന് പ്രസിഡന്റ് ഡൊണാൾഡ് ട്രംപ് പറഞ്ഞു. നിലവിലെ വെടിനിർത്തൽ കരാർ വെന്റിലേറ്ററിലാണെന്നും അത് അങ്ങേയറ്റം ദുർബലമാണെന്നും അദ്ദേഹം പരിഹസിച്ചു. ഭാവിയിൽ ഉണ്ടാകുന്ന ഏത് കരാറിലും ഇറാൻ ആണവായുധം നിർമ്മിക്കില്ല എന്ന കാര്യത്തിൽ വ്യക്തമായ ഉറപ്പ് വേണമെന്ന് ട്രംപ് നിർബന്ധം പിടിച്ചു. യുദ്ധക്കളത്തിലെ സാഹചര്യങ്ങൾ മാറുന്നതിനനുസരിച്ച് അമേരിക്കയുടെ സൈനികവും രാഷ്ട്രീയവുമായ പദ്ധതികളിൽ മാറ്റം വരുത്താൻ താൻ തയ്യാറാണെന്നും, തന്റെ ഭരണകാലത്ത് ഇറാനെ ഒരിക്കലും ആണവശക്തിയാകാൻ അനുവദിക്കില്ലെന്നും അദ്ദേഹം വ്യക്തമാക്കി.
ഇറാൻ നൽകിയ പുതിയ നിർദ്ദേശങ്ങളെ ഒരു ‘മാലിന്യക്കഷണം’ എന്നാണ് ട്രംപ് വിശേഷിപ്പിച്ചത്. ആണവ പദ്ധതി ഉപേക്ഷിക്കുന്ന കാര്യത്തിൽ അവർക്ക് ആത്മാർത്ഥതയില്ലാത്തതിനാൽ ആ രേഖ താൻ പൂർണ്ണമായി വായിച്ചുപോലുമില്ലെന്ന് അദ്ദേഹം പറഞ്ഞു. ഒരു നിശ്ചിത കാലത്തേക്ക് ആണവായുധം വികസിപ്പിക്കില്ലെന്ന ലളിതമായ ഉറപ്പാണ് അമേരിക്ക പ്രതീക്ഷിച്ചതെങ്കിലും ഇറാന് അതിന് സാധിച്ചില്ല. ചർച്ചകളിൽ നിന്ന് വിട്ടുനിൽക്കുകയും ഓരോ തവണയും നിലപാടുകൾ മാറ്റുകയും ചെയ്യുന്ന ഇറാൻ, ഒപ്പിട്ട കരാറുകളിൽ നിന്ന് പോലും പിന്നോട്ടുപോയി മറ്റൊരു രേഖ അയക്കുകയാണെന്നും അദ്ദേഹം കുറ്റപ്പെടുത്തി. ഇറാന്റെ അടുത്ത നീക്കങ്ങളെ തടയാനുള്ള തന്റെ തന്ത്രങ്ങൾ ഇപ്പോൾ വെളിപ്പെടുത്താൻ കഴിയില്ലെങ്കിലും, അവരുടെ ആണവ മോഹങ്ങൾ തകർക്കുക എന്നതിനാണ് മുൻഗണനയെന്നും ട്രംപ് കൂട്ടിച്ചേർത്തു.
ഇറാൻ നേതൃത്വത്തിനുള്ളിലെ ഭിന്നതയെക്കുറിച്ചും ട്രംപ് സംസാരിച്ചു. ഭരണകൂടത്തിൽ ഒരു വിഭാഗം കരാറിനെ അനുകൂലിക്കുമ്പോൾ മറ്റൊരു വിഭാഗം കഠിനമായ നിലപാടുമായി മുന്നോട്ടുപോവുകയാണ്. മിതവാദികൾ കഠിനവാദികളെ ഭയപ്പെടുന്ന സാഹചര്യമാണുള്ളത്. ഇറാന്റെ ആണവ കേന്ദ്രങ്ങളിൽ അമേരിക്ക നടത്തിയ ആക്രമണങ്ങളെ ട്രംപ് ശക്തമായി ന്യായീകരിച്ചു. സമുദ്രത്തിനടിയിലുള്ള അന്തർവാഹിനികളിൽ നിന്ന് തൊടുത്ത ടോമാഹോക്ക് മിസൈലുകൾ ഉപയോഗിച്ച് നടത്തിയ കൃത്യമായ ആക്രമണത്തിൽ ആ കേന്ദ്രങ്ങൾ പൂർണ്ണമായും തകർന്നു. തകർന്നടിഞ്ഞ അവശിഷ്ടങ്ങൾക്കിടയിൽ നിന്ന് ആണവ വസ്തുക്കൾ പുറത്തെടുക്കാൻ പോലും ഇറാന് കഴിയില്ലെന്നും, അത്തരം അത്യാധുനിക യന്ത്രങ്ങൾ അമേരിക്കയുടെയും ചൈനയുടെയും പക്കൽ മാത്രമേ ഉള്ളൂവെന്നും അദ്ദേഹം അവകാശപ്പെട്ടു.
അമേരിക്കയുടെ സൈനിക കരുത്തിന് മുന്നിൽ ഇറാൻ ദുർബലമായെന്നും അവരുടെ വ്യോമസേനയും പ്രതിരോധ സംവിധാനങ്ങളും ഇപ്പോൾ ഫലപ്രദമല്ലെന്നും ട്രംപ് പറഞ്ഞു. സൈനിക നേതൃത്വത്തിലെ പ്രധാനികളെല്ലാം കൊല്ലപ്പെട്ടതോടെയാണ് അവർ വീണ്ടും ചർച്ചയ്ക്ക് തയ്യാറായത്. മുൻപ് ഒബാമയും ബൈഡനും അംഗീകരിച്ചതിനേക്കാൾ മോശമായ നിർദ്ദേശങ്ങളാണ് ഇറാൻ ഇപ്പോൾ മുന്നോട്ടുവെക്കുന്നത്. ഒബാമ ഉണ്ടാക്കിയ കരാർ ഒരു വർഷത്തിനുള്ളിൽ ഇറാന് ആണവായുധം നൽകുന്നതായിരുന്നു. തന്റെ ആദ്യ ഭരണകാലത്ത് ആ കരാർ റദ്ദാക്കിയതിലൂടെയും ശക്തമായ ആക്രമണങ്ങൾ നടത്തിയതിലൂടെയും ഇറാന്റെ ആണവ മോഹങ്ങളെ രണ്ടുതവണ തടയാൻ തനിക്ക് സാധിച്ചുവെന്ന് അദ്ദേഹം പറഞ്ഞു.
ഇറാനിലെ വിപ്ലവകാരികൾക്ക് ആയുധങ്ങൾ എത്തിക്കുന്നതിൽ ഉണ്ടായ പരാജയത്തെ തുടർന്ന് കുർദുകളോടുള്ള അതൃപ്തിയും ട്രംപ് പ്രകടിപ്പിച്ചു. നിലവിലെ സംഘർഷങ്ങൾ അവസാനിക്കുന്നതോടെ ആഗോള വിപണിയിൽ എണ്ണവില വലിയ തോതിൽ കുറയുമെന്നാണ് ട്രംപിന്റെ പ്രവചനം. ഹോർമുസ് കടലിടുക്കിലെ തടസ്സങ്ങൾ ഭയന്ന് ലോകരാജ്യങ്ങൾ ഇപ്പോൾ മറ്റ് വഴികൾ തേടുകയാണെന്നും, ഊർജ്ജ ആവശ്യങ്ങൾക്കായി പല രാജ്യങ്ങളും അമേരിക്കയിലെ ടെക്സസ്, അലാസ്ക തുടങ്ങിയ സ്ഥലങ്ങളിലേക്ക് തിരിയുന്നത് രാജ്യത്തിന് ഗുണകരമാകുമെന്നും അദ്ദേഹം പറഞ്ഞു.