കുവൈത്ത് സിറ്റി – കുവൈത്തിലും ബഹ്റൈനിലും ഇറാന്റെ മിസൈല്, ഡ്രോണ് ആക്രമണ ശ്രമങ്ങള്. കുവൈത്തിലേക്ക് തൊടുത്തുവിട്ട രണ്ട് ഇറാന് മിസൈലുകള് ലക്ഷ്യം കാണാതെ പോവുകയോ തകര്ന്നുവീഴുകയോ ചെയ്തതായി യു.എസ് സൈന്യം അറിയിച്ചു. ബഹ്റൈനിലേക്ക് തൊടുത്തുവിട്ട മൂന്ന് മിസൈലുകള് യു.എസ്, ബഹ്റൈന് സൈന്യം തടഞ്ഞതായും യു.എസ് സെന്ട്രല് കമാന്ഡ് പറഞ്ഞു. ഇറാനില് നിന്ന് വിക്ഷേപിച്ച മിസൈലുകളും ഡ്രോണുകളും യു.എസ് സേന വിജയകരമായി തടഞ്ഞ് വീഴ്ത്തിയതായും മിഡില് ഈസ്റ്റിന്റെ വിവിധ ഭാഗങ്ങളില് നടത്തിയ ആക്രമണ ശ്രമങ്ങള്ക്ക് മറുപടിയായി ഖെഷം ദ്വീപിലെ സൈനിക കേന്ദ്രത്തില് ആക്രമണങ്ങള് നടത്തിയതായും യു.എസ് സെന്ട്രല് കമാന്ഡ് എക്സ് പ്ലാറ്റ്ഫോം വഴി പുറത്തിറക്കിയ പ്രസ്താവനയില് വ്യക്തമാക്കി.
പ്രാദേശിക ജലാശയങ്ങളിലെ സാധാരണക്കാരെ ലക്ഷ്യമിട്ട മൂന്ന് ഇറാന് ഡ്രോണുകള് യു.എസ് സേന വെടിവച്ചിട്ടതായും ഖെഷം ദ്വീപിലെ ഒരു സൈനിക ഗ്രൗണ്ട് കണ്ട്രോള് സ്റ്റേഷന് നേരെ പ്രതിരോധ ആക്രമണങ്ങള് നടത്തിയതായും യു.എസ് സെന്ട്രല് കമാന്ഡ് പ്രസ്താവനയില് സൂചിപ്പിച്ചു. ഇറാന് ആക്രമണങ്ങളില് യു.എസ് ഉദ്യോഗസ്ഥരില് ആര്ക്കും പരിക്കേറ്റിട്ടില്ല. ഭീഷണികളെ നേരിടാന് സൈന്യം അതീവ ജാഗ്രതയിലാണെന്നും സെന്ട്രല് കമാന്ഡ് വ്യക്തമാക്കി.
രാജ്യത്ത് സൈറണുകള് മുഴക്കിയതായി അറിയിച്ച ബഹ്റൈന് ആഭ്യന്തര മന്ത്രാലയം, പൗരന്മാരും പ്രവാസികളും ശാന്തത പാലിക്കണമെന്നും അടുത്തുള്ള സുരക്ഷിത സ്ഥലത്ത് അഭയം തേടണമെന്നും അഭ്യര്ഥിച്ചു. തങ്ങളുടെ വ്യോമ പ്രതിരോധ സംവിധാനങ്ങള് ശത്രുതാപരമായ മിസൈല്, ഡ്രോണ് ആക്രമണങ്ങളെ തടയുന്നുണ്ടെന്നും ബന്ധപ്പെട്ട വകുപ്പുകള് പുറപ്പെടുവിച്ച സുരക്ഷാ നിര്ദ്ദേശങ്ങള് പാലിക്കണമെന്നും കുവൈത്ത് സൈന്യം ജനങ്ങളോട് അഭ്യര്ഥിച്ചു. ഏതെങ്കിലും സ്ഫോടനങ്ങള് കേട്ടത് ഇന്റര്സെപ്ഷന് പ്രവര്ത്തനങ്ങളുടെ ഫലമാണെന്നും സൈന്യം കൂട്ടിച്ചേര്ത്തു.
പൊതു സുരക്ഷക്ക് അപകടസാധ്യതയുള്ളതിനാല്, മിസൈലുകളും ഡ്രോണുകളും തടസ്സപ്പെടുത്തുന്നതിലൂടെ ഉണ്ടായേക്കാവുന്ന അവശിഷ്ടങ്ങള്, കഷ്ണങ്ങള്, തിരിച്ചറിയാത്ത വസ്തുക്കള് എന്നിവയെ സമീപിക്കുകയോ സ്പര്ശിക്കുകയോ ചെയ്യരുതെന്ന് സൈന്യത്തിന്റെ ജനറല് സ്റ്റാഫ് പൗരന്മാരോടും പ്രവാസികളോടും അഭ്യര്ഥിക്കുന്നതായി കുവൈത്ത് പ്രതിരോധ മന്ത്രാലയ വക്താവ് കേണല് സൗദ് അല്അത്വാന് പറഞ്ഞു. അത്തരം അവശിഷ്ടങ്ങളെ കുറിച്ച് എമര്ജന്സി നമ്പര് (112) വഴിയോ ബന്ധപ്പെട്ട വകുപ്പുകള് വഴിയോ ഉടന് റിപ്പോര്ട്ട് ചെയ്യണമെന്നും സുരക്ഷാ നിര്ദ്ദേശങ്ങള് പാലിക്കണമെന്നും ഔദ്യോഗികവും വിശ്വസനീയവുമായ ഉറവിടങ്ങളില് നിന്ന് വിവരങ്ങള് തേടണമെന്നും പ്രതിരോധ മന്ത്രാലയ വക്താവ് അറിയിച്ചു.
അതേസമയം, ഇസ്ലാമിക് റെവല്യൂഷണറി ഗാര്ഡ് ബഹ്റൈനിലെ യു.എസ് ഫിഫ്ത്ത് ഫ്ളീറ്റ് ആസ്ഥാനത്ത് മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയതായി ഇറാന് മാധ്യമങ്ങള് റിപ്പോര്ട്ട് ചെയ്തു. ഖെഷം ദ്വീപിന് തെക്ക് റെവല്യൂഷണറി ഗാര്ഡ് കമ്മ്യൂണിക്കേഷന് ടവര് ലക്ഷ്യമിട്ട് യു.എസ് ആക്രമണം നടത്തിയതിനുള്ള പ്രതികാരമായാണ് ഈ ആക്രമണമെന്നും റെവല്യൂഷണറി ഗാര്ഡ് കൂട്ടിച്ചേര്ത്തു. ഹോര്മുസ് കടലിടുക്കിന് സമീപം ഇറാന് എണ്ണ ടാങ്കറിനു നേരെ യു.എസ് നടത്തിയ മിസൈല് ആക്രമണത്തിന് തിരിച്ചടിയായി തങ്ങളുടെ നാവിക സേന ബനിയ എന്ന കപ്പലിനെ മിസൈലുകള് ഉപയോഗിച്ച് ആക്രമിച്ചതായി റെവല്യൂഷണറി ഗാര്ഡ് പറഞ്ഞു. അമേരിക്കന് ആക്രമണത്തില് ഇറാന് എണ്ണ ടാങ്കറിന്റെ എന്ജിന് റൂമിന് കേടുപാടുകള് സംഭവിച്ചു. ഹോര്മുസ് കടലിടുക്കിന്റെ സുരക്ഷ അസ്ഥിരപ്പെടുത്തുന്നത് യു.എസ് സൈന്യത്തിന് കനത്ത നഷ്ടം വരുത്തുമെന്നും റെവല്യൂഷണറി ഗാര്ഡ് പറഞ്ഞു.