മനാമ – മൂന്ന് ആഫ്രിക്കന് രാജ്യങ്ങളില് എബോള പൊട്ടിപ്പുറപ്പെട്ടതിനെ കുറിച്ച ലോകാരോഗ്യ സംഘടനയുടെ മുന്നറിയിപ്പുകളെ തുടര്ന്ന്, ചൊവ്വാഴ്ച മുതല് എല്ലാ വിമാന സര്വീസുകളിലും ദക്ഷിണ സുഡാന്, ഡെമോക്രാറ്റിക് റിപ്പബ്ലിക് ഓഫ് കോംഗോ, ഉഗാണ്ട എന്നിവിടങ്ങളില് നിന്ന് എത്തുന്ന ബഹ്റൈന് ഇതര യാത്രക്കാര് രാജ്യത്ത് പ്രവേശിക്കുന്നത് ബഹ്റൈന് താല്ക്കാലികമായി വിലക്കി. ഈ മൂന്ന് രാജ്യങ്ങളില് നിന്ന് നേരിട്ട് വരുന്ന യാത്രക്കാരുടെയും ബഹ്റൈനില് എത്തുന്നതിന് 30 ദിവസത്തിനുള്ളില് ഈ രാജ്യങ്ങളില് ഉണ്ടായിരുന്ന യാത്രക്കാരുടെയും ബഹ്റൈനിലേക്കുള്ള പ്രവേശനം താല്ക്കാലികമായി നിരോധിക്കാനായി ബഹ്റൈന് അന്താരാഷ്ട്ര വിമാനത്താവളം വഴിയുള്ള പ്രവേശന നടപടിക്രമങ്ങള് അപ്ഡേറ്റ് ചെയ്തതായി സിവില് ഏവിയേഷന് അഫയേഴ്സ് അറിയിച്ചു. മൂന്ന് രാജ്യങ്ങളില് നിന്ന് സ്വദേശത്തേക്ക് മടങ്ങുന്ന ബഹ്റൈന് പൗരന്മാര് രാജ്യത്ത് എത്തിച്ചേരുമ്പോള് അംഗീകൃത ആരോഗ്യ പ്രോട്ടോക്കോളുകള്ക്ക് വിധേയമായിരിക്കുമെന്ന് അധികൃതര് പറഞ്ഞു.
ബഹ്റൈന് അന്താരാഷ്ട്ര വിമാനത്താവളം വഴി എത്തുന്ന യാത്രക്കാര്ക്കായി പുറപ്പെടുവിച്ച എല്ലാ ഔദ്യോഗിക നിര്ദ്ദേശങ്ങളും കര്ശനമായി പാലിക്കണം. ചൊവ്വാഴ്ച മുതല് 30 ദിവസത്തേക്ക് താല്ക്കാലിക പ്രവേശന വിലക്ക് നടപടികള് നിലനില്ക്കുമെന്നും ഇത് തുടര്ച്ചയായ അവലോകനത്തിന് വിധേയമാകുമെന്നും സിവില് ഏവിയേഷന് അഫയേഴ്സ് കൂട്ടിച്ചേര്ത്തു. എബോള വൈറസ് വ്യാപനവുമായി ബന്ധപ്പെട്ട സംഭവവികാസങ്ങളും ആ രാജ്യങ്ങളിലെ പകര്ച്ചവ്യാധി സാഹചര്യവും അനുസരിച്ച് ബാധിത രാജ്യങ്ങളുടെ പട്ടിക അപ്ഡേറ്റ് ചെയ്യാമെന്നും അധികൃതര് വ്യക്തമാക്കി.