ജിദ്ദ- ലോക ഫുട്ബോൾ മാമാങ്കത്തിന്റെ ആവേശം ഉൾക്കൊണ്ട്, അതിന്റെ മുന്നോടിയായായി ജിദ്ദയിൽ ആവേശകരമായ നയൻസ് ഫുട്ബോൾ ടൂർണ്ണമെന്റ് സംഘടിപ്പിക്കുന്നു. “വേൾഡ് കപ്പ് ഡമാക്ക 2K26” എന്ന് പേരിട്ടിരിക്കുന്ന കായികമേള നിസ്സ് അറേബ്യ ഇവന്റ് കമ്പനിയുടെ നേതൃത്വത്തിലാണ് അരങ്ങേറുന്നത്. സ്പോർട്സ് അതോറിറ്റിയുടെ ഔദ്യോഗിക അനുമതിയോടെ നടത്തുന്ന ടൂർണ്ണമെന്റ്, ജൂൺ 18, 19 (വ്യാഴം, വെള്ളി) തീയതികളിൽ ജിദ്ദ കിംഗ് ഫഹദ് റോഡിലുള്ള ഒളിമ്പിക് സ്റ്റേഡിയത്തിൽ (ജിദ്ദ പാർക്കിന് സമീപം) നടക്കും. ജിദ്ദയിലെ ഇന്ത്യൻ കമ്മ്യൂണിറ്റിയിലെ പ്രമുഖരായ എട്ട് ടീമുകളാണ് ഈ പ്രവാസി ഫുട്ബോൾ പൂരത്തിൽ മാറ്റുരയ്ക്കുന്നത്.
വ്യാഴാഴ്ച രാത്രി 9 മണിക്ക് ആവേശകരമായ മത്സരങ്ങൾക്ക് കിക്കോഫ് കുറിക്കും. തുടർന്ന് വെള്ളിയാഴ്ച രാത്രി 7 മണിക്ക് സമാപന ചടങ്ങുകൾ നടക്കും. മത്സരങ്ങൾക്കൊപ്പം പ്രവാസി മലയാളി കുടുംബങ്ങൾക്കായി മികച്ച കായികാന്തരീക്ഷവും വൈവിധ്യമാർന്ന വിനോദ നിമിഷങ്ങളും സംഘാടകർ ഒരുക്കുന്നുണ്ട്. ടൂർണ്ണമെന്റിന്റെ പ്രധാന ആകർഷണമായി 15 നും 17 നും ഇടയിൽ പ്രായമുള്ള കൗമാരക്കാരുടെ രണ്ട് ടീമുകൾ അണിനിരക്കുന്ന സൗഹൃദ ഫുട്ബോൾ മത്സരവും ഉണ്ടായിരിക്കും. യുവ ഫുട്ബോൾ പ്രതിഭകളെ പ്രോത്സാഹിപ്പിക്കാനും പുതിയ തലമുറയെ കായികരംഗത്തേക്ക് കൂടുതൽ ആകർഷിക്കാനുമാണ് ഈ പ്രത്യേക മത്സരം ഉൾപ്പെടുത്തിയിരിക്കുന്നത്.
ജിദ്ദയിലെ എന്റർടൈൻമെന്റ്, സ്പോർട്സ് മേഖലകളിൽ പ്രൊഫഷണൽ ശൈലിയുമായി കടന്നുവന്ന നിസ്സ് അറേബ്യ ഇവന്റ് കമ്പനി, വിവിധ ഏഷ്യൻ കമ്മ്യൂണിറ്റികൾക്കായി സ്പോർട്സ്, സാംസ്കാരിക, കുടുംബ സംഗമങ്ങൾ മികച്ച രീതിയിൽ ഒരുക്കുക എന്ന ലക്ഷ്യത്തോടെയാണ് പ്രവർത്തിക്കുന്നത്. നിലവിലെ ടൂർണ്ണമെന്റ് ഇന്ത്യൻ കമ്മ്യൂണിറ്റിയെ കേന്ദ്രീകരിച്ചാണെങ്കിലും, ഭാവിയിൽ മറ്റ് ഏഷ്യൻ കമ്മ്യൂണിറ്റികളെക്കൂടി ഉൾപ്പെടുത്തി വിപുലമായ പ്രോഗ്രാമുകൾ നടത്തുമെന്ന് അധികൃതർ വ്യക്തമാക്കി.
ജിദ്ദയിലെ ഏഷ്യൻ കമ്മ്യൂണിറ്റികൾക്ക് ഒരുപോലെ പ്രയോജനപ്പെടുന്ന ഉയർന്ന നിലവാരത്തിലുള്ള ഒരു പ്രൊഫഷണൽ പ്ലാറ്റ്ഫോമായി നിസ്സ് അറേബ്യയെ വളർത്തുകയാണ് തങ്ങളുടെ ലക്ഷ്യമെന്ന് കമ്പനി മാനേജിങ് ഡയറക്ടർ നൗഷാദ് ചാത്തല്ലൂർ അറിയിച്ചു. സമൂഹത്തിന്റെ വിവിധ മേഖലകളെ കൂട്ടിയിണക്കുന്ന പുതിയ ആശയങ്ങളുള്ള പരിപാടികൾക്ക് കമ്പനി മുൻഗണന നൽകുമെന്നും അദ്ദേഹം കൂട്ടിച്ചേർത്തു. ഡോ. ഇന്ദു ചന്ദ്രശേഖരൻ, ഇവന്റ് ചെയർമാനായും, റാഫി ബീമാപള്ളി ഇവന്റ് കൺവീനറായും ടൂർണ്ണമെന്റിന് നേതൃത്വം നൽകുന്നു.
വിവിധ പ്രവാസി കൂട്ടായ്മകൾക്കും സ്ഥാപനങ്ങൾക്കും ആവശ്യമായ നിയമാനുസൃത ലൈസൻസുകളും പ്രോഗ്രാം ഓർഗനൈസേഷൻ സേവനങ്ങളും പ്രൊഫഷണലായി നൽകുന്ന വിശ്വസനീയമായ ഒരു സംവിധാനമായി നിസ്സ് അറേബ്യ പ്രവർത്തിക്കുമെന്ന് മാനേജ്മെന്റ് അറിയിച്ചു. വലിയ ജനപങ്കാളിത്തവും കമ്മ്യൂണിറ്റി ഐക്യവും പ്രതീക്ഷിക്കുന്ന “വേൾഡ് കപ്പ് ഡമാക്ക 2K26” ലേക്ക് ജിദ്ദയിലെ മുഴുവൻ കായികപ്രേമികളെയും കുടുംബങ്ങളെയും സ്വാഗതം ചെയ്യുന്നതായി സംഘാടകർ അറിയിച്ചു.