ജിസാൻ– പ്രവാസി ക്രിക്കറ്റ് പ്രേമികൾക്ക് ആവേശം പകർന്ന 2026-ലെ ജിസാൻ സ്വാത് സാൽമി ക്രിക്കറ്റ് ടൂർണമെന്റിൽ സൂപ്പർ ഏഷ്യ ക്രിക്കറ്റ് ക്ലബ്ബ് ജേതാക്കളായി. ആവേശകരമായ ഫൈനൽ പോരാട്ടത്തിൽ സ്വാത് സാൽമി ക്രിക്കറ്റ് ക്ലബ്ബിനെ പരാജയപ്പെടുത്തിയാണ് അവർ കിരീടം ചൂടിയത്. മത്സരത്തിൽ ടോസ് നേടിയ സൂപ്പർ ഏഷ്യ ആദ്യം ഫീൽഡിംഗ് തിരഞ്ഞെടുക്കുകയായിരുന്നു. നിശ്ചിത 8 ഓവറിൽ 135 റൺസെടുത്ത സ്വാത് സാൽമി, സൂപ്പർ ഏഷ്യയ്ക്ക് മുന്നിൽ 136 റൺസിന്റെ വിജയലക്ഷ്യമാണ് ഉയർത്തിയത്. മറുപടി ബാറ്റിംഗിന് ഇറങ്ങിയ സൂപ്പർ ഏഷ്യ വെറും 7.2 ഓവറിൽ ലക്ഷ്യം മറികടന്ന് ഉജ്ജ്വല വിജയം സ്വന്തമാക്കി.
ജിസാൻ പ്രവിശ്യയിലെ പതിനാല് പ്രമുഖ ക്ലബ്ബുകൾ കഴിഞ്ഞ രണ്ട് മാസമായി മാറ്റുരച്ച ടൂർണമെന്റിനാണ് ഇതോടെ ആവേശകരമായ സമാപ്തിയായത്. ഫൈനൽ മത്സരത്തിലെ മികച്ച പ്രകടനത്തിലൂടെ ഉമർ രാജ ‘മാൻ ഓഫ് ദ മാച്ച്’ പുരസ്കാരത്തിന് അർഹനായി. ടൂർണമെന്റിലുടനീളം മികച്ച പ്രകടനം കാഴ്ചവെച്ച കലീമുള്ള ഖാനെ ‘പ്ലെയർ ഓഫ് ദ ടൂർണമെന്റ്’ ആയി തിരഞ്ഞെടുത്തു. ഇരുവരും ട്രോഫികളും ക്യാഷ് പ്രൈസുകളും ഏറ്റുവാങ്ങി.
മത്സരത്തിന് ശേഷം നടന്ന സമ്മാനദാന ചടങ്ങിൽ അതിഥികളായ സൗദി കെഎംസിസി ദേശീയ സെക്രട്ടറി ഹാരിസ് കല്ലായി, ജെപിസിഎൽ ചെയർമാൻ ഖിസ്രോ ഖാൻ ബഹ്ലൂൾ എന്നിവർ പങ്കെടുത്തു. വിജയികളായ ടീമിനും മികച്ച പ്രകടനം പുറത്തെടുത്ത കായിക താരങ്ങൾക്കുമുള്ള ട്രോഫികളും ക്യാഷ് പ്രൈസുകളും ഇരുവരും ചേർന്ന് വിതരണം ചെയ്തു. ജിസാനിലെ ക്രിക്കറ്റ് ആരാധകർക്ക് മറക്കാനാവാത്ത ഒരു കായിക വിരുന്നാണ് ഈ ടൂർണമെന്റ് സമ്മാനിച്ചത്.