ജിദ്ദ – വിദേശ രാജ്യങ്ങളില് നിന്നുള്ള ഹജ് തീര്ഥാടകരുടെ യാത്ര സുഗമമാക്കുന്നതിന് ലഗേജ് രഹിത ഹജ് സേവനം ഇത്തവണയും നടപ്പാക്കുന്നതായി ഹജ്, ഉംറ മന്ത്രാലയം അറിയിച്ചു. തീര്ഥാടകരുടെ യാത്ര എളുപ്പമാക്കാനും ലഗേജ് കൊണ്ടുനടക്കേണ്ടിവരുന്നതു മൂലമുള്ള പ്രയാസം ലഘൂകരിക്കാനുമാണ് ഈ സേവനത്തിലൂടെ ലക്ഷ്യമിടുന്നത്. സ്വന്തം രാജ്യങ്ങളില് നിന്ന് മക്കയിലേക്കും മദീനയിലേക്കും യാത്ര പുറപ്പെടുമ്പോള് തീര്ഥാടകരുടെ ലഗേജുകള് സ്വദേശങ്ങളിലെ വിമാനത്താവളങ്ങളില് നിന്ന് സ്വീകരിച്ച് മക്കയിലെയും മദീനയിലെയും താമസസ്ഥലങ്ങളില് നേരിട്ട് എത്തിച്ചു നല്കുന്ന സേവനമാണിത്. ജിദ്ദയിലെയും മദീനയിലെയും എയര്പോര്ട്ടുകളില് വിമാനമിറങ്ങിയാലുടന് ലഗേജുകള്ക്ക് കാത്തുനില്ക്കാതെയും അവ വഹിച്ചുനടക്കാതെയും താമസസ്ഥലങ്ങളിലേക്ക് നേരിട്ട് പോകാന് ഈ സേവനം തീര്ഥാടകരെ സഹായിക്കും. ബന്ധപ്പെട്ട ഹജ് സര്വീസ് കമ്പനി ലഗേജുകള് സ്വീകരിച്ച് മക്കയിലെയും മദീനയിലെയും ഹാജിമാരുടെ താമസസ്ഥലങ്ങളില് നേരിട്ട് എത്തിച്ചുനല്കുകയാണ് ചെയ്യുക. ഹാജിമാരുടെ മടക്കയാത്രയിലും ഈ സേവനം നടപ്പാക്കും. ഇത് കൂടുതല് സൗകര്യപ്രദവും വ്യവസ്ഥാപിതവുമായ ഹജ് അനുഭവം നല്കുന്നു. ലഗേജ് കൊണ്ടുപോകുന്നതിന്റെ ബുദ്ധിമുട്ടില്ലാതെ എളുപ്പത്തിലുള്ള ചലനം, ലഗേജ് ട്രാക്ക് ചെയ്യാനുള്ള കഴിവ്, മെച്ചപ്പെട്ട സുരക്ഷ, വ്യക്തിഗത വസ്തുക്കളുടെ പരിചരണം എന്നിവ ഉള്പ്പെടെ ലഗേജ് രഹിത ഹജ് സേവനം നിരവധി ഗുണങ്ങള് നല്കുന്നു.
ലഗേജ് അയക്കുമ്പോള് നിര്ദിഷ്ട ഭാര പരിധികള് പാലിക്കണമെന്നും ലഗേജ് കൈമാറിയതുമായി ബന്ധപ്പെട്ട വിശദാംശങ്ങള് സൂക്ഷിക്കണമെന്നും യാത്രയിലും കര്മ്മങ്ങള് നിര്വഹിക്കുമ്പോഴും ആവശ്യമായ അവശ്യവസ്തുക്കള് അടങ്ങിയ ഹാന്ഡ് ബാഗ് കൈവശം വെക്കണമെന്നും മന്ത്രാലയം തീര്ഥാടകരോട് അഭ്യര്ഥിച്ചു. ഹജ് സര്വീസ് കമ്പനികള് വഴിയും ഹജ്, ഉംറ മന്ത്രാലയത്തിന്റെ ഔദ്യോഗിക ആശയവിനിമയ മാര്ഗങ്ങളിലൂടെയും സേവനത്തെ കുറിച്ച കൂടുതല് വിവരങ്ങളും വിശദാംശങ്ങളും ലഭ്യമാണെന്ന് മന്ത്രാലയം വ്യക്തമാക്കി.