ബാങ്കുറ– പശ്ചിമ ബംഗാളിലെ തൃണമൂൽ കോൺഗ്രസ് സർക്കാരിനെ താഴെയിറക്കാൻ ബി.ജെ.പി 1000 കോടി രൂപയുടെ അട്ടിമറി കരാർ ഉണ്ടാക്കിയെന്ന ഗുരുതര ആരോപണവുമായി മുഖ്യമന്ത്രി മമത ബാനർജി രംഗത്തെത്തി. ബാങ്കുറയിലെ ഒണ്ടയിൽ നടന്ന തെരഞ്ഞെടുപ്പ് റാലിയിൽ സംസാരിക്കുകയായിരുന്നു അവർ. ന്യൂനപക്ഷ വോട്ടുകൾ ഭിന്നിപ്പിച്ച് തൃണമൂലിനെ പരാജയപ്പെടുത്താൻ ബി.ജെ.പി വൻതോതിൽ പണമൊഴുക്കുകയാണെന്നും മുഖ്യമന്ത്രി കുറ്റപ്പെടുത്തി.
ആം ജനത ഉന്നയൻ പാർട്ടി അധ്യക്ഷൻ ഹുമയൂൺ കബീറിന്റേതെന്ന പേരിൽ പ്രചരിക്കുന്ന വൈറൽ വീഡിയോ ഉയർത്തിക്കാട്ടിയായിരുന്നു മമതയുടെ കടന്നാക്രമണം. താൻ ബി.ജെ.പി നേതാക്കളുമായി സമ്പർക്കത്തിലാണെന്നും തൃണമൂലിനെ വീഴ്ത്താൻ 1000 കോടി രൂപയുടെ കരാറിൽ 200 കോടി രൂപ അഡ്വാൻസ് കൈപ്പറ്റിയെന്നും കബീർ പറയുന്നതാണ് വീഡിയോയുടെ ഉള്ളടക്കമെന്ന് മമത പറഞ്ഞു. എന്നാൽ ഈ വീഡിയോയുടെ വിശ്വാസ്യത സ്വതന്ത്രമായി സ്ഥിരീകരിക്കപ്പെട്ടിട്ടില്ലെന്നാണ് ഹുമയൂൺ കബീർ പിന്നീട് പ്രതികരിച്ചത്.
കേന്ദ്രത്തിലെ ബി.ജെ.പി ഭരണത്തിന്റെ അന്ത്യം അടുത്തിരിക്കുകയാണെന്നും 2026-ഓടെ അവർ അധികാരത്തിൽ നിന്ന് വീഴുമെന്നും മമത പ്രവചിച്ചു. വോട്ടർ പട്ടിക പുതുക്കുന്ന പ്രക്രിയയിൽ രാജ്യത്തെ ഏറ്റവും വലിയ അഴിമതിയാണ് നടന്നത്. അധികാരത്തിൽ നിന്ന് പുറത്താകുന്നതോടെ ബി.ജെ.പി കൊണ്ടുവന്ന ജനവിരുദ്ധ നിയമങ്ങളെല്ലാം റദ്ദാക്കുമെന്നും അവർ പ്രഖ്യാപിച്ചു. തെരഞ്ഞെടുപ്പ് ഡ്യൂട്ടിക്കെത്തിയ കേന്ദ്രസേന പരിശോധനയുടെ പേരിൽ സ്ത്രീകളെ അപമാനിക്കുന്നതായും ബിഹാറിലെ സാഹചര്യം ഉദാഹരണമാക്കി ബി.ജെ.പിയുടെ വാഗ്ദാനങ്ങൾ വെറും പാഴ്വാക്കുകളാണെന്നും മുഖ്യമന്ത്രി കൂട്ടിച്ചേർത്തു. വോട്ടിങ് മെഷീനുകളിൽ കൃത്രിമം കാണിക്കാനും വോട്ടെണ്ണൽ വൈകിപ്പിക്കാനും നീക്കമുണ്ടെന്നും ഇതിനെതിരെ അണികൾ അതീവ ജാഗ്രത പാലിക്കണമെന്നും മമത ബാനർജി ആഹ്വാനം ചെയ്തു.