തിരുവനന്തപുരം– സംസ്ഥാനത്ത് വീണ്ടും അവയവദാനം. തിരുവനന്തപുരം സ്വദേശിയായ കൃഷ്ണ ലാലിന്റെ (33) അവയവങ്ങളാണ് മസ്തിഷ്ക മരണത്തെത്തുടർന്ന് ദാനം ചെയ്യുന്നത്. വെൽഡിംഗ് തൊഴിലാളിയായ ഇദ്ദേഹത്തിന് ഈ മാസം ഒന്നാം തീയതി രാത്രി സൈക്കിളിൽ സാധനങ്ങൾ വാങ്ങാൻ പോകുന്നതിനിടെ കാറിടിച്ചാണ് അപകടമുണ്ടായത്. തുടർന്ന് തിരുവനന്തപുരം കിംസ് ആശുപത്രിയിൽ ചികിത്സയിലായിരുന്ന അദ്ദേഹത്തിന് ഇന്നലെയാണ് മസ്തിഷ്ക മരണം സംഭവിച്ചത്.
കൃഷ്ണ ലാലിന്റെ ഹൃദയം ഉൾപ്പെടെ അഞ്ചോളം അവയവങ്ങളാണ് ദാനം നൽകുന്നത്. ഇതിൽ ഹൃദയം തിരുവനന്തപുരം കിംസ് ആശുപത്രിയിൽ നിന്ന് കോട്ടയം മെഡിക്കൽ കോളേജിലേക്ക് എത്തിക്കും. ഉച്ചയ്ക്ക് ഒരു മണിയോടെ ഹൃദയം കൊണ്ടുപോകുന്നതിനുള്ള നടപടിക്രമങ്ങൾ അധികൃതർ പൂർത്തിയാക്കിയിട്ടുണ്ട്. ഇദ്ദേഹത്തിന്റെ ഒരു വൃക്ക തിരുവനന്തപുരം മെഡിക്കൽ കോളേജ് ആശുപത്രിയിലേക്കും മറ്റൊന്ന് കിംസ് ആശുപത്രിയിലേക്കുമാണ് നൽകുന്നത്.
വൃക്കകൾക്ക് പുറമെ കരൾ അദ്ദേഹം ചികിത്സയിലുണ്ടായിരുന്ന കിംസ് ആശുപത്രിക്ക് തന്നെ നൽകാനാണ് തീരുമാനിച്ചിരിക്കുന്നത്. കൃഷ്ണ ലാലിന്റെ നേത്രപടലങ്ങൾ തിരുവനന്തപുരം കണ്ണാശുപത്രിക്ക് കൈമാറും. നാടിനെ നൊമ്പരപ്പെടുത്തിയ അപകടത്തിന് പിന്നാലെ, അഞ്ചുപേർക്ക് പുതുജീവൻ നൽകാനുള്ള ഈ അവയവദാന നടപടികൾ ബന്ധപ്പെട്ട ആശുപത്രികളുടെ ഏകോപനത്തോടെയാണ് നടക്കുന്നത്.