തെഹ്റാൻ: അമേരിക്കയ്ക്കും ഇസ്രായിലിനുമെതിരായ പോരാട്ടത്തിൽ തങ്ങളാണ് വിജയികളെന്നും, യുദ്ധം അവസാനിപ്പിക്കാനുള്ള നിബന്ധനകൾ നിശ്ചയിക്കാൻ തങ്ങൾക്ക് അവകാശമുണ്ടെന്നും ഇറാൻ സൈനിക വക്താവ് മുഹമ്മദ് അക്റമി പ്രസ്താവിച്ചു. ഒരു പത്രസമ്മേളനത്തിലാണ് ഇറാൻ തങ്ങളുടെ വിജയവും ഉറച്ച നിലപാടും വ്യക്തമാക്കിയത്. എന്നാൽ, ഇറാൻ വലിയ തകർച്ചയെ നേരിടുകയാണെന്നും അവർ വെടിനിർത്തൽ കരാറിനായി അതിയായി ആഗ്രഹിക്കുന്നുണ്ടെന്നുമാണ് യു.എസ് പ്രസിഡന്റ് ഡൊണാൾഡ് ട്രംപിന്റെ മറുവാദം. ലോകത്തിലെ ഏറ്റവും വലിയ സൈനിക ശക്തിയായ അമേരിക്കയുമായി കരാറിൽ ഏർപ്പെടാൻ ഇറാൻ നിർബന്ധിതരാകുമെന്നും ട്രംപ് കൂട്ടിച്ചേർത്തു.
അതേസമയം, സംഘർഷങ്ങൾക്കിടയിലും നയതന്ത്ര പരിഹാരത്തിനുള്ള സാധ്യതകൾ തേടുകയാണെന്ന് യു.എസ് മിഡിലീസ്റ്റ് പ്രതിനിധി സ്റ്റീവ് വിറ്റ്കോഫ് അറിയിച്ചു. അമേരിക്ക മുന്നോട്ടുവെച്ച 15 പോയിന്റ് നിർദ്ദേശങ്ങളോട് ഇറാൻ എങ്ങനെ പ്രതികരിക്കുമെന്ന് രാജ്യം ഉറ്റുനോക്കുകയാണ്. ഹോർമുസ് കടലിടുക്കിലൂടെയുള്ള ഗതാഗതത്തിന് ടോൾ ഏർപ്പെടുത്താനുള്ള ഇറാന്റെ നീക്കത്തിനെതിരെ യു.എസ് സ്റ്റേറ്റ് സെക്രട്ടറി മാർക്കോ റൂബിയോ ശക്തമായ മുന്നറിയിപ്പ് നൽകി. ഇത്തരം നീക്കങ്ങൾ അന്താരാഷ്ട്ര തലത്തിൽ അംഗീകരിക്കാനാവില്ലെന്നും, കരസേനയെ വിന്യസിക്കാതെ തന്നെ ഇറാനിൽ ലക്ഷ്യങ്ങൾ കൈവരിക്കാൻ അമേരിക്കയ്ക്ക് സാധിക്കുമെന്നും അദ്ദേഹം പറഞ്ഞു. റഷ്യയുടെ പിന്തുണ അമേരിക്കൻ നടപടികൾക്ക് തടസ്സമാകില്ലെന്ന് വ്യക്തമാക്കിയ റൂബിയോ, ചർച്ചകൾക്കായി ഇറാന്റെ ഭാഗത്തുനിന്നുള്ള വ്യക്തമായ സൂചനകൾക്കായി കാത്തിരിക്കുകയാണെന്നും കൂട്ടിച്ചേർത്തു.