ബഗ്ദാദ് – ഇറാഖിന്റെ തലസ്ഥാനമായ ബഗ്ദാദിലെ മൻസൂർ ജില്ലയിലെ ഇറാഖി നാഷണൽ ഇന്റലിജൻസ് സർവീസ് ആസ്ഥാനത്ത് ഡ്രോൺ തകർന്നതിനെ തുടർന്ന് ഒരു ഉദ്യോഗസ്ഥൻ മരിച്ചതായി സെക്യൂരിറ്റി മീഡിയ സെൽ അറിയിച്ചു. ഞങ്ങളുടെ ആസ്ഥാനത്തിന് സമീപം നിയമവിരുദ്ധർ നടത്തിയ ആക്രമണത്തിൽ ഉദ്യോഗസ്ഥൻ രക്തസാക്ഷിയായതായി ഇന്റലിജൻസ് സർവീസ് സ്ഥിരീകരിച്ചതായി പ്രാദേശിക വാർത്താ ഏജൻസി റിപ്പോർട്ട് ചെയ്തു. പ്രാദേശിക സമയം രാവിലെ 10:15നാണ് ഡ്രോൺ തകർന്നുവീണതെന്ന് സെക്യൂരിറ്റി മീഡിയ സെൽ മേധാവി സഅദ് മഅൻ ഹ്രസ്വ പ്രസ്താവനയിൽ പറഞ്ഞു.
ബഗ്ദാദിലെയും കുർദിസ്ഥാൻ പ്രവിശ്യയിലെയും അമേരിക്കൻ സാന്നിധ്യം, നയതന്ത്ര കാര്യാലയങ്ങൾ, സൈനിക താവളങ്ങൾ എന്നിവ ലക്ഷ്യമിട്ട് ഇറാഖിൽ വർധിച്ചുവരുന്ന ഡ്രോൺ ആക്രമണങ്ങളുടെ പരമ്പരക്കിടെയാണ് പുതിയ സംഭവം.
ഇറാഖിലെ ഇസ്ലാമിക് റെസിസ്റ്റൻസും മറ്റ് വിഭാഗങ്ങളും ബഗ്ദാദ് വിമാനത്താവളത്തിനടുത്തുള്ള അമേരിക്കയുടെ വിക്ടറി താവളത്തിൽ ഡ്രോണുകൾ ഉപയോഗിച്ച് ആക്രമണം നടത്തുന്നുണ്ട്. ഗ്രീൻ സോണിലെ യു.എസ് എംബസിയും എർബിൽ വിമാനത്താവളത്തിന് സമീപമുള്ള സൈനിക താവളങ്ങളും ഇസ്ലാമിക് റെസിസ്റ്റൻസും മറ്റ് വിഭാഗങ്ങളും ആക്രമിച്ചിട്ടുണ്ട്. ഇറാഖ്, യു.എസ് പ്രതിരോധ സംവിധാനങ്ങൾ ഈ ഡ്രോണുകളിൽ പലതും തടഞ്ഞു. പക്ഷേ അവയിൽ ചിലത് പ്രാദേശിക, വിദേശ സേനകൾക്ക് പരിക്കുണ്ടാക്കുകയും നാശനഷ്ടങ്ങൾക്കും കാരണമായിട്ടുണ്ട്.