കയ്റോ – വടക്കുകിഴക്കന് ഈജിപ്തില് മത്സ്യത്തൊഴിലാളികള് സഞ്ചരിക്കുകയായിരുന്ന മിനിബസും ട്രക്കും കൂട്ടിയിടിച്ചുണ്ടായ അപകടത്തില് 18 പേര് മരിച്ചു. വടക്കന് തുറമുഖങ്ങളെ കയ്റോയുമായി ബന്ധിപ്പിക്കുന്ന റോഡിലാണ് അപകടം നടന്നത്. മരണപ്പെട്ടവരില് നാലു പേരുടെ മൃതദേഹങ്ങള് ഛിന്നഭിന്നമായ നിലയിലായിരുന്നു. അമിത വേഗതയും, മോശം കാലാവസ്ഥ കാരണമായി ദൃശ്യപരത കുറഞ്ഞതുമാണ് അപകടത്തിന് കാരണം.
ഈജിപ്ഷ്യന് പ്രധാനമന്ത്രി മുസ്തഫ മദ്ബൂലി ഇരകളുടെ കുടുംബങ്ങളെ അനുശോചനം അറിയിക്കുകയും കുടുംബങ്ങള്ക്ക് സാമ്പത്തിക സഹായം നല്കാന് ഉത്തരവിടുകയും ചെയ്തു. ഗതാഗത നിയമങ്ങള് കര്ശനമായി നടപ്പാക്കാത്തതിനാലും നിരവധി റോഡുകള് മോശം അവസ്ഥയിലായതിനാലും ഈജിപ്തില് വാഹനാപകടങ്ങള് സാധാരണമാണ്.
ഇരുപത്തിനാലു മണിക്കൂറിനിടെ രാജ്യത്ത് 1,11,583 ഗതാഗത നിയമലംഘനങ്ങള് രേഖപ്പെടുത്തിയതായി വെള്ളിയാഴ്ച ആഭ്യന്തര മന്ത്രാലയം പ്രസ്താവനയില് അറിയിച്ചു. 2024 ല് ഈജിപ്തിലെ റോഡുകളില് 5,200 ലേറെ പേര് മരിച്ചതായി സെന്ട്രല് ഏജന്സി ഫോര് പബ്ലിക് മൊബിലൈസേഷന് ആന്റ് സ്റ്റാറ്റിസ്റ്റിക്സ് സ്ഥിതിവിവര കണക്കുകള് വ്യക്തമാക്കുന്നു. ഗ്രാമപ്രദേശങ്ങളിലെ പ്രായപൂര്ത്തിയാകാത്ത തൊഴിലാളികള് സഞ്ചരിക്കുന്ന വാഹനങ്ങളാണ് പലപ്പോഴും അപകടങ്ങളില് പെടുന്നത്. ഇവര് പലപ്പോഴും തിരക്കേറിയ മിനിബസുകളിലോ ജലപാതകള് മുറിച്ചുകടക്കാന് ചെറിയ ബോട്ടുകളിലോ യാത്ര ചെയ്യേണ്ടി വരികയാണ്.