കയ്റോ – വിശുദ്ധ റമദാനില് ഈജിപ്തില് വ്യാപാര സ്ഥാപനങ്ങള് കൂടുതല് സമയം തുറന്ന് പ്രവര്ത്തിപ്പിക്കാന് അധികൃതര് അനുമതി നല്കി. റമദാനിന് ദിവസങ്ങള് മാത്രം ശേഷിക്കെ, വിശുദ്ധ റമദാന് മാസത്തിലും ഈദുല് ഫിത്ര് അവധിക്കാലത്തും ഈജിപ്തില് വ്യാപാര സ്ഥാപനങ്ങളുടെയും റസ്റ്റോറന്റുകളുടെയും അടച്ചിടല് സമയങ്ങള് നിര്ണയിച്ച് ഈജിപ്ഷ്യന് സര്ക്കാര് പുതിയ പ്രസ്താവന പുറത്തിറക്കി.
പൗരന്മാരുടെ ആവശ്യങ്ങള് നിറവേറ്റാനും വിശുദ്ധ മാസത്തിന് അനുയോജ്യമായ ഉത്സവ അന്തരീക്ഷം നല്കാനുമുള്ള പ്രാദേശിക വികസന, പരിസ്ഥിതി മന്ത്രാലയത്തിന്റെ പ്രതിബദ്ധത ഊന്നിപ്പറഞ്ഞുകൊണ്ട് വകുപ്പ് മന്ത്രി ഡോ. മനാല് അവദ് പുതിയ അടച്ചിടല് സമയങ്ങള് പ്രഖ്യാപിച്ചു.
കടകള്, മാളുകള്, റസ്റ്റോറന്റുകള്, കഫേകള് എന്നിവ ദിവസവും പുലര്ച്ചെ 2:00 മണി വരെ തുറന്ന് പ്രവര്ത്തിപ്പിക്കാന് അനുമതിയുണ്ട്. പൗരന്മാരുടെ ആവശ്യങ്ങള് നിറവേറ്റാനായി റമദാനില് റസ്റ്റോറന്റുകളിലും കഫേകളിലുമുള്ള ടേക്ക്അവേ, ഹോം ഡെലിവറി സേവനങ്ങള് 24 മണിക്കൂറും തുടരും. പാതയോര വര്ക്ക്ഷോപ്പുകളും പെട്രോള് ബങ്കുകളും ഒഴികെ, റെസിഡന്ഷ്യല് ഏരിയകള്ക്കുള്ളിലെ വര്ക്ക്ഷോപ്പുകള് രാത്രി 10:00 മണിക്ക് അടക്കണം. പൗരന്മാര്ക്ക് അടിസ്ഥാന ആവശ്യങ്ങളുടെ ലഭ്യത ഉറപ്പാക്കുന്നതിന് പലചരക്ക് കടകള്, സൂപ്പര്മാര്ക്കറ്റുകള്, ബേക്കറികള്, ഫാര്മസികള്, മൊത്തവ്യാപാര വിപണികള് തുടങ്ങിയ അവശ്യ സേവനങ്ങളെയും അടച്ചിടല് സമയങ്ങളില് നിന്ന് ഒഴിവാക്കിയിട്ടുണ്ട്. 2026 ഫെബ്രുവരി 18 ബുധനാഴ്ച മുതല് ഈദുല് ഫിത്ര് അവധി അവസാനിക്കുന്നതുവരെ പുതിയ പ്രവര്ത്തന സമയം പ്രാബല്യത്തില് ഉണ്ടായിരിക്കുമെന്ന് പ്രാദേശിക വികസന, പരിസ്ഥിതി മന്ത്രാലയം പ്രസ്താവനയില് പറഞ്ഞു.
എല്ലാ സ്ഥാപനങ്ങളും നിശ്ചിത സമയം പാലിക്കുന്നുണ്ടെന്ന് ഉറപ്പാക്കാന് മോണിറ്ററിംഗ് കമ്മിറ്റികള് സജീവമാക്കാനും ഫീല്ഡ് പരിശോധനകള് ശക്തമാക്കാനും പ്രാദേശിക വികസന മന്ത്രി ഗവര്ണറേറ്റുകള്ക്ക് നിര്ദേശം നല്കി. സാമ്പത്തിക പ്രവര്ത്തനങ്ങളുടെയും പൗരന്മാരുടെ സൗകര്യം ഉറപ്പാക്കുന്നതിന്റെയും ആവശ്യകതകള്ക്കിടയില് സന്തുലിതാവസ്ഥ കൈവരിക്കാനും വിശുദ്ധ റമദാനിലും ഈദുല് ഫിത്ര് ദിവസങ്ങളിലും ഈജിപ്തിലെ തെരുവുകളില് ക്രമസമാധാനം ഉറപ്പാക്കാനുമാണ് വ്യാപാര സ്ഥാപനങ്ങള്ക്ക് നിശ്ചയിച്ച അസാധാരണ സമയങ്ങളിലൂടെ ലക്ഷ്യമിടുന്നതെന്ന് മന്ത്രി മനാല് അവദ് പറഞ്ഞു.