കുവൈത്ത് സിറ്റി– കള്ളപ്പണം വെളുപ്പിക്കല് കേസിലെ പ്രതികളായ കുവൈത്തി പൗരനും ഏഷ്യന് വംശജനും കീഴ്ക്കോടതി വിധിച്ച ഏഴു വര്ഷം കഠിന തടവ് ശിക്ഷ അപ്പീല് കോടതി ശരിവെച്ചു. പണംവെളിപ്പുക്കല്, രാജ്യത്തിന്റെ ദേശീയ താല്പ്പര്യങ്ങള്ക്ക് ഹാനിയുണ്ടാക്കല്, ലൈസന്സില്ലാത്ത ബാങ്കിംഗ് പ്രവര്ത്തനങ്ങളില് ഏര്പ്പെടല് എന്നീ കുറ്റങ്ങളിലാണ് പ്രതികളെ നേരത്തെ വിചാരണ കോടതി ഏഴു വര്ഷം കഠിന് തടവിന് ശിക്ഷിച്ചത്.
നിയമവിരുദ്ധമായ പണമിടപാടുകളുമായി ബന്ധപ്പെട്ട ഒന്നിലധികം സാമ്പത്തിക കുറ്റകൃത്യങ്ങളില് പ്രതികള് കുറ്റക്കാരാണെന്ന് കണ്ടെത്തി, ഫസ്റ്റ് ഇന്സ്റ്റന്സ് കോടതി പുറപ്പെടുവിച്ച വിധി കൗണ്സിലര് ഡോ. ഫഹദ് ബൂസാലിബിന്റെ നേതൃത്വത്തിലുള്ള അപ്പീല് പാനല് ശരിവെക്കുകയായിരുന്നു. ജയില് ശിക്ഷക്ക് പുറമേ, കേസില് ഉള്പ്പെട്ട രണ്ട് പ്രതികളും മൂന്ന് കമ്പനികളും മൊത്തം 83,67,360 കുവൈത്തി ദീനാര് നല്കണമെന്നും കോടതി ഉത്തരവിട്ടു. ഏതെങ്കിലും വാണിജ്യ പ്രവര്ത്തനം നടത്തുന്നതില് നിന്ന് കമ്പനികളെ അഞ്ച് വര്ഷത്തേക്ക് വിലക്കിയിട്ടുമുണ്ട്. ജയില് ശിക്ഷ പൂര്ത്തിയായ ശേഷം രണ്ടാമത്തെ പ്രതിയെ നാടുകടത്താനും വിധിയില് വ്യവസ്ഥ ചെയ്തിട്ടുണ്ട്. നിയമപരമായ നടപടിക്രമങ്ങളുടെ ഭാഗമായി കമ്പനികള്ക്കുള്ള ശിക്ഷാവിധി ഔദ്യോഗിക ഗസറ്റില് പ്രസിദ്ധീകരിക്കാനും കോടതി ഉത്തരവിട്ടു.