റിയാദ്– സൗദി അറേബ്യയില് വൈദ്യശാസ്ത്ര നവോത്ഥാനത്തിന്റെ ശില്പിയും മുന് സൗദി റെഡ് ക്രസന്റ് അതോറിറ്റി പ്രസിഡന്റും മുന് ശൂറാ കൗണ്സില് അംഗവുമായ ഡോ. അബ്ദുറഹ്മാന് അല്സുവൈലിം അന്തരിച്ചു. വൈദ്യശാസ്ത്രത്തിലും ജീവകാരുണ്യ പ്രവര്ത്തനങ്ങളിലും രാജ്യത്തെ ഏറ്റവും പ്രമുഖ വ്യക്തികളില് ഒരാളായ ഡോ. അബ്ദുറഹ്മാന് അല്സുവൈലിം നജ്ദ് മേഖലയില് ജീവിതം ആരംഭിച്ച് പ്രശസ്തമായ ജര്മ്മന് സര്വകലാശാലകളില് പഠനം പൂര്ത്തിയാക്കി രാജ്യത്തിന്റെ ആധുനിക ആരോഗ്യ പരിചരണ നവോഥാനത്തിലെ ഏറ്റവും പ്രധാന വ്യക്തിയായി രാജ്യത്ത് തിരിച്ചെത്തി ഔദ്യോഗിക ജീവിതത്തിന് തുടക്കമിട്ടത്.
ഡോ. അബ്ദുറഹ്മാന് അല്സുവൈലിമിന്റെ കരിയറിന്റെ പ്രാധാന്യം മെഡിക്കല് പ്രാക്ടീസിനപ്പുറം വ്യാപിച്ച വിശാലമായ സ്വാധീനമായിരുന്നു. ആരോഗ്യ മന്ത്രാലയത്തിനും സ്പെഷ്യലിസ്റ്റ് ആശുപത്രികള്ക്കും ഇടയിലുള്ള വിടവ് നികത്തുന്നതില് മുന്കൈയെടുത്ത് അദ്ദേഹം ആരോഗ്യ സംവിധാനത്തിന്റെ വികസനത്തിന് പ്രധാന സംഭാവന നല്കി. എഴുപതുകള് മുതല് അദ്ദേഹം കിംഗ് ഫൈസല് സ്പെഷ്യലിസ്റ്റ് ആശുപത്രിയുമായും അന്താരാഷ്ട്ര ഗവേഷണ കേന്ദ്രങ്ങളുമായും സജീവ സഹകരണം വളര്ത്തിയെടുത്തു. 1966 ല് മ്യൂണിക്ക് സര്വകലാശാലയില് നിന്ന് ബിരുദം നേടിയ ശേഷമാണ് ഡോ. അബ്ദുറഹ്മാന് അല്സുവൈലിം പ്രൊഫഷണല് യാത്ര ആരംഭിച്ചത്. അദ്ദേഹത്തിന്റെ വ്യക്തിഗത വിജയഗാഥ രാജ്യത്തെ മെഡിക്കല് പ്രൊഫഷന്റെ പ്രാദേശികവല്ക്കരണത്തിലെ നിര്ണായക നിമിഷമായി മാറി. എഡിന്ബര്ഗ് സര്വകലാശാലയുമായി സഹകരിച്ച് ഹിജ്റ 1400 -ല് (1979/1980) രാജ്യത്തെ ആദ്യത്തെ ബിരുദാനന്തര ബിരുദ പ്രോഗ്രാമായ പീഡിയാട്രിക്സ് ഡിപ്ലോമ സ്ഥാപിക്കാന് മുന്കൈയെടുത്തത് അദ്ദേഹമായിരുന്നു. ഈ പ്രോഗ്രാം 400 ലേറെ സൗദി ശിശുരോഗ വിദഗ്ധരുടെ ബിരുദദാനത്തിന് സഹായിച്ചു. അവരില് പലരും പിന്നീട് ആരോഗ്യ സംരക്ഷണ മേഖലയില് നേതൃസ്ഥാനങ്ങളിലെത്തി. സുസ്ഥിര ആരോഗ്യ സംരക്ഷണം മനുഷ്യ വികസനത്തിലും ദേശീയ പ്രതിഭകളുടെ പരിശീലനത്തിലും അധിഷ്ഠിതമാണെന്ന ഡോ. അബ്ദുറഹ്മാന് അല്സുവൈലിമിന്റെ വിശ്വാസത്തിന് ഇത് അടിവരയിടുന്നു.
ആരോഗ്യ മന്ത്രാലയ അണ്ടര് സെക്രട്ടറിയില് നിന്ന് സൗദി റെഡ് ക്രസന്റ് അതോറിറ്റി പ്രസിഡന്റായി മാറിയപ്പോള് ഡോ. അബ്ദുറഹ്മാന് അല്സുവൈലിം ഭരണപരമായ പരമ്പരാഗത പങ്ക് മറികടന്നു. മുന്നിര ബോധവല്ക്കരണ പരിപാടികളിലൂടെ, പ്രത്യേകിച്ച് ഡോക്ടര് ഓണ് ദി ഫോണ് പ്രോഗ്രാമിലൂടെ പൊതുജനാരോഗ്യത്തെ പിന്തുണക്കുന്നതില് മാധ്യമങ്ങളുടെ പങ്ക് അദ്ദേഹം നേരത്തെ തന്നെ തിരിച്ചറിഞ്ഞു. ക്ലിനിക്കിനുള്ളിലെ ക്ലിനിക്കല് സാഹചര്യത്തില് നിന്ന് റേഡിയോ, ടെലിവിഷന് എന്നിവയിലൂടെ പൊതുസമൂഹത്തെ ബോധവല്ക്കരിക്കാനുള്ള ഒരു ഉപകരണമായി മെഡിക്കല് പ്രൊഫഷനെ മാറ്റിയതില് അദ്ദേഹത്തിന്റെ സ്വാധീനം പ്രകടമായിരുന്നു. ശൂറ കൗണ്സില് അംഗമെന്ന നിലയില് അവസാനത്തെ ഔദ്യോഗിക സ്ഥാനം വരെ അദ്ദേഹം ഈ സമീപനം തുടര്ന്നു. സൂക്ഷ്മമായ വൈദ്യശാസ്ത്രത്തെ സന്നദ്ധസേവനത്തിന്റെയും ജീവകാരുണ്യ പ്രവര്ത്തനത്തിന്റെയും മനോഭാവവുമായി സംയോജിപ്പിക്കുന്ന പാരമ്പര്യം അവശേഷിപ്പിച്ചാണ് ഡോ. അബ്ദുറഹ്മാന് അല്സുവൈലിം ഇഹലോകവാസം വെടിഞ്ഞത്. രോഗികള്ക്കും സമൂഹത്തിനും ആരോഗ്യ അവബോധത്തിന്റെയും സേവനത്തിന്റെയും സംസ്കാരം ഉറപ്പിക്കാന് ഇത് സഹായിച്ചു.
ഡോ. അബ്ദുറഹ്മാന് അല്സുവൈലിമിന്റെ വിയോഗത്തില് ആരോഗ്യമന്ത്രി ഡോ. ഫഹദ് അല്ജലാജില് അനുശോചനം രേഖപ്പെടുത്തി. സൗദി റെഡ് ക്രസന്റ് അതോറിറ്റി പ്രസിഡന്റായിരുന്ന കാലത്ത് ഡോ. അബ്ദുറഹ്മാന് അല്സുവൈലിം ലോകത്ത് ജീവകാരുണ്യ പ്രവര്ത്തനങ്ങളില് വലിയ സംഭാവനകള് നല്കിയിട്ടുണ്ടെന്നും ചാരിറ്റബിള് സൊസൈറ്റികള്ക്ക് നിര്ലോഭ പിന്തുണ നല്കിയതായും സൗദിയില് വൈദ്യശാസ്ത്ര, പൊതുജനാരോഗ്യ മേഖലകളില് ശാശ്വത പാരമ്പര്യം അവശേഷിപ്പിച്ചതായും ആരോഗ്യ മന്ത്രി അനുസ്മരിച്ചു.