തെല്അവീവ് – വെസ്റ്റ് ബാങ്കിലെ ദെയ്ര് ശറഫ് ഗ്രാമത്തില് ആയുധധാരികളായ ജൂതകുടിയേറ്റക്കാര് 67 കാരനായ ബാസിം സ്വാലിഹ് യാസീന് എന്ന ഫലസ്തീന് വൃദ്ധനെ ക്രൂരമായി മര്ദിക്കുന്നതിന്റെ സിസിടിവി ദൃശ്യങ്ങള് പുറത്തുവന്നു. ഒരു ജര്മ്മന്-ഫലസ്തീന് നഴ്സറിയില് അതിക്രമിച്ചു കയറിയ മുഖംമൂടി ധരിച്ച ഡസന് കണക്കിന് അക്രമികള് വടികളുമായി വൃദ്ധനെ വളഞ്ഞിട്ട് മര്ദിക്കുകയും ചവിട്ടുകയും ചെയ്യുന്ന ദൃശ്യങ്ങളാണ് പുറത്തുവന്നത്. ബധിരനായതിനാല് മറ്റുള്ളവര് നല്കിയ മുന്നറിയിപ്പ് കേള്ക്കാന് കഴിയാതിരുന്ന യാസീന് രക്ഷപ്പെടാന് ശ്രമിക്കുന്നതിനിടെ അക്രമികളുടെ കൈയില് അകപ്പെടുകയായിരുന്നു. നിലത്ത് വീണുകിടന്ന ഇദ്ദേഹത്തിന്റെ തലയിലും നെഞ്ചിലും പുറത്തും ക്രൂരമായി മര്ദിക്കുകയും കൈയിലെ എല്ലുകള് ഒടിക്കുകയും ചെയ്തു. ഗുരുതരമായി പരിക്കേറ്റ യാസീന് നിലവില് ആശുപത്രിയിലാണ്.
ആക്രമണത്തിനിടെ നഴ്സറിയിലെ നാല് കാറുകള് അക്രമികള് അഗ്നിക്കിരയാക്കി. കഴിഞ്ഞ ഒരു വര്ഷത്തിനിടെ മൂന്നാം തവണയാണ് ഈ സ്ഥാപനത്തിന് നേരെ ആക്രമണമുണ്ടാകുന്നതെന്നും ഇതിനോടകം ആറു ലക്ഷം ഡോളറിന്റെ നഷ്ടം സംഭവിച്ചതായും ഉടമകള് പറഞ്ഞു. സംഭവവുമായി ബന്ധപ്പെട്ട് മൂന്ന് പേരെ കസ്റ്റഡിയിലെടുത്തതായി ഇസ്രായില് സൈന്യം അറിയിച്ചു. ഇസ്രായില് പ്രധാനമന്ത്രി ബെഞ്ചമിന് നെതന്യാഹു ഈ നീചകൃത്യത്തെ അപലപിച്ചുവെങ്കിലും, വെസ്റ്റ് ബാങ്കില് ഫലസ്തീനികള്ക്കെതിരെയുള്ള കുടിയേറ്റക്കാരുടെ ആക്രമണം ദൈനംദിന സംഭവമായി മാറിയിരിക്കുകയാണെന്ന് മനുഷ്യാവകാശ സംഘടനകള് ചൂണ്ടിക്കാട്ടുന്നു. പ്രത്യേകിച്ച് ഒലിവ് വിളവെടുപ്പ് കാലത്ത് ഇത്തരം അക്രമങ്ങള് വര്ധിച്ചിട്ടും അധികൃതരുടെ ഭാഗത്തുനിന്ന് ശക്തമായ സംരക്ഷണ നടപടികള് ഉണ്ടാകുന്നില്ലെന്ന് ഫലസ്തീനികള് ആരോപിക്കുന്നു.