ദമാസ്‌കസ് – സിറിയന്‍ ഇന്‍ഫര്‍മേഷന്‍ മന്ത്രി ഹംസ അല്‍മുസ്തഫ വ്യക്തമാക്കി. സിറിയന്‍ പ്രദേശത്തിന്റെ ഒരു ചാണ്‍ പോലും വിട്ടുകൊടുക്കാന്‍ സിറിയ വിസമ്മതിക്കുന്നതായി ഇന്‍ഫര്‍മേഷന്‍ മന്ത്രി ഹംസ അല്‍മുസ്തഫ വ്യക്തമാക്കി. സിറിയന്‍ ന്യൂസ് ചാനലിന് നല്‍കിയ അഭിമുഖത്തിലാണ് ഇന്‍ഫര്‍മേഷന്‍ മന്ത്രി പറഞ്ഞത്.
സിറിയയിലെ സൈനിക സംഘര്‍ഷത്തിന് പിന്നില്‍ നെതന്യാഹുവിന്റെ വ്യക്തിപരമായ ലക്ഷ്യങ്ങളാണ്. നിലവില്‍ നമ്മള്‍ ശക്തരല്ലെന്ന് ഇസ്രായില്‍ മനസ്സിലാക്കുന്നു. ഇസ്രായിലിന്റെ ആക്രമണം സിറിയ നേരിടുന്ന ഏറ്റവും ഗുരുതരമായ സുരക്ഷാ വെല്ലുവിളികളിലൊന്നാണ്. സൈനിക ഏറ്റുമുട്ടലിലേക്ക് സിറിയയെ വലിച്ചിഴക്കാനുള്ള ഇസ്രായിലിന്റെ ശ്രമമാണിത്. ഈ ഭീഷണികളെ സിറിയന്‍ ഭരണകൂടം നിശ്ചയദാര്‍ഢ്യത്തോടെയും ഉത്തരവാദിത്തത്തോടെയും കൈകാര്യം ചെയ്യുന്നുണ്ട്. സിറിയയുടെ പരമാധികാരത്തെ ദുര്‍ബലപ്പെടുത്താന്‍ ലക്ഷ്യമിട്ടുള്ള ഒന്നും അടിച്ചേല്‍പ്പിക്കാന്‍ ഇസ്രായിലിനെ അനുവദിക്കില്ലെന്നും ഹംസ അല്‍മുസ്തഫ പറഞ്ഞു.
അതേസമയം, സിറിയയിലെ ഇസ്രായില്‍ ആക്രമണങ്ങള്‍ തടയാന്‍ അന്താരാഷ്ട്ര സമൂഹം ഉറച്ച നിലപാട് സ്വീകരിക്കണമെന്ന് സിറിയന്‍ വിദേശ മന്ത്രി അസ്അദ് അല്‍ശൈബാനി ആവശ്യപ്പെട്ടു. ബെയ്ത്ത് ജിനിലെ സംഭവങ്ങള്‍ ഇസ്രായിലി ആക്രമണമാണ്. പുതിയ സിറിയ അതിന്റെ എല്ലാ പൗരന്മാരുടെയും സ്വദേശത്തേക്കുള്ള തിരിച്ചുവരവിന് പ്രതിജ്ഞാബദ്ധമാണെന്ന് ഡാനിഷ് വിദേശ മന്ത്രി ലാര്‍സ് ലോക്കെ റാസ്മുസ്സനുമായുള്ള കൂടിക്കാഴ്ചയില്‍ അസ്അദ് അല്‍ശൈബാനി വ്യക്തമാക്കി. ആവര്‍ത്തിച്ചുള്ള ഇസ്രായിലി ആക്രമണങ്ങള്‍ മുഴുവന്‍ മേഖലയെയും സംഘര്‍ഷത്തിലേക്ക് തള്ളിവിടുകയാണെന്നും വിദേശ മന്ത്രി പറഞ്ഞു.
തുടര്‍ച്ചയായി രണ്ടാം ദിവസവും ദമാസ്‌കസ് ഗ്രാമപ്രദേശത്തുള്ള ബെയ്ത്ത് ജിന്‍ ഗ്രാമത്തിന് മുകളിലൂടെ ഇസ്രായില്‍ ഡ്രോണുകള്‍ പറന്നു. തെക്കന്‍ സിറിയയില്‍ ഇസ്രായിലി സൈനിക പ്രവര്‍ത്തനങ്ങളില്‍ ഗണ്യമായ വര്‍ധനവ് ഉണ്ടായെന്ന് റിപ്പോര്‍ട്ടുകള്‍ പറയുന്നു. ഖുനൈത്രയിലെ തെക്കന്‍ ഗ്രാമപ്രദേശങ്ങളില്‍ ഇസ്രായില്‍ സൈനിക പട്രോളിംഗ് നടത്തി.
ആറ് സൈനികര്‍ക്ക് പരിക്കേറ്റ അസാധാരണ സംഭവത്തെ തുടര്‍ന്ന് ഇസ്രായില്‍ സിറിയന്‍ പ്രസിഡന്റ് അഹ്മദ് അല്‍ശറഇന് ശക്തമായ മുന്നറിയിപ്പ് സന്ദേശം നല്‍കിയിട്ടുണ്ട്. ശത്രുതാപരമായ ഗ്രൂപ്പുകള്‍ അവിടെ സാന്നിധ്യം സ്ഥാപിക്കാതിരിക്കാന്‍ ഇസ്രായിലിന് തങ്ങള്‍ പിടിച്ചെടുത്ത പ്രദേശങ്ങളില്‍ നിന്ന് പിന്‍വാങ്ങാന്‍ കഴിയില്ലെന്നും വ്യക്തമാക്കി. നിലവില്‍ സിറിയയുമായി കരാറിന് സാധ്യതയില്ലെന്നാണ് റിപ്പോര്‍ട്ടുകള്‍.
ബെയ്ത്ത് ജിനിലെ സംഭവം മുന്‍കൂട്ടി ആസൂത്രണം ചെയ്ത ആക്രമണമായിരുന്നില്ലെന്ന് ഇസ്രായിലി സുരക്ഷാ ഉദ്യോഗസ്ഥർ പറഞ്ഞു. തങ്ങളുടെ പ്രദേശത്ത് ഇസ്രായിലി സൈന്യത്തിന്റെ പ്രവര്‍ത്തനങ്ങള്‍ കണ്ട തദ്ദേശവാസികളുടെ പ്രതികരണമായിരുന്നു അത്. അവര്‍ ഒത്തുകൂടി ഇസ്രായില്‍ സൈനികര്‍ക്കു നേരെ വെടിയുതിര്‍ക്കുകയായിരുന്നു. വെള്ളിയാഴ്ച പുലര്‍ച്ചെ ദമാസ്‌കസിലെ ബെയ്ത്ത് ജിന്‍ ഗ്രാമത്തെ ലക്ഷ്യമിട്ട് നടത്തിയ ഇസ്രായിലി ബോംബാക്രമണത്തില്‍ 13 പേരാണ് കൊല്ലപ്പെട്ടത്. ഇതോടൊപ്പം ഇസ്രായിലി സൈനിക പട്രോളിംഗ് ഗ്രാമത്തിലേക്ക് കടന്നുകയറുകയും ചെയ്തിട്ടുണ്ട്.