ജിദ്ദ – വൈറ്റ് ഫ്രൈഡേ സീസണില്‍ തട്ടിപ്പ് ശ്രമങ്ങള്‍ വര്‍ധിക്കുമെന്ന് സൗദി ബാങ്കുകള്‍ക്കു കീഴിലെ ബാങ്കിംഗ് ബോധവല്‍ക്കരണ, മീഡിയ കമ്മിറ്റി മുന്നറിയിപ്പ് നല്‍കി. ഔദ്യോഗിക ഉറവിടങ്ങള്‍ വഴി ഉപയോക്താക്കള്‍ ഓഫറുകള്‍ പരിശോധിക്കണമെന്ന് കമ്മിറ്റി ആവശ്യപ്പെട്ടു. ഉപയോക്താക്കളെ കെണിയിലകപ്പെടുത്താന്‍ തട്ടിപ്പുകാര്‍ വ്യാജ ഓഫറുകള്‍ മുതലെടുക്കുന്നു. വാങ്ങുന്നതിനുമുമ്പ് വെബ്സൈറ്റുകളുടെയും ആപ്ലിക്കേഷനുകളുടെയും വിശ്വാസ്യത പരിശോധിക്കണമെന്നും ലിങ്ക് ഔദ്യോഗിക വെബ്സൈറ്റുമായി പൊരുത്തപ്പെടുന്നുണ്ടെന്ന് ഉറപ്പാക്കണമെന്നും യഥാര്‍ഥ റിവ്യൂകള്‍ പരിശോധിക്കണമെന്നും കമ്മിറ്റി എക്‌സ് അക്കൗണ്ട് വഴി ആവശ്യപ്പെട്ടു. വഞ്ചനാപരമായ ഷിപ്പിംഗ് ഇ-മെയിലുകള്‍ക്കെതിരെ ഉപയോക്താക്കള്‍ ജാഗ്രത പാലിക്കണം. വ്യാജ ഓഫറുകളിലൂടെ തട്ടിപ്പുകാര്‍ ഉപയോക്താക്കളെ കെണിയലകപ്പെടുത്താന്‍ ശ്രമിക്കുന്നതിനാല്‍ ഓഫറുകള്‍ യുക്തിസഹമാണെന്ന് ഉറപ്പുവരുത്തണം. ഓര്‍ഡര്‍ ചെയ്ത ശേഷം ഇതുപ്രകാരമുള്ളതല്ലാത്ത ഒരു ഫീസും അടക്കരുതെന്നും ബാങ്കിംഗ് ബോധവല്‍ക്കരണ, മീഡിയ കമ്മിറ്റി ആവശ്യപ്പെട്ടു.
വൈറ്റ് ഫ്രൈഡേ സീസണ്‍ അടുക്കുമ്പോള്‍, സര്‍പ്രൈസ് ഓഫറുകള്‍, എല്ലായിടത്തും പരസ്യങ്ങള്‍, കൗണ്ട്ഡൗണ്‍ അവസാനിക്കുന്നതിന് മുമ്പ് മികച്ച ഡീല്‍ പ്രയോജനപ്പെടുത്താന്‍ ശ്രമിക്കുന്ന ഷോപ്പര്‍മാര്‍ തുടങ്ങിയ കണ്ടന്റുകൾ ഇന്റര്‍നെറ്റ് നിറയുന്നു. സൈബര്‍ ആക്രമണങ്ങള്‍ വര്‍ധിച്ചുകൊണ്ടിരിക്കുകയാണ്. ഷോപ്പര്‍മാരുടെ ആകാംക്ഷ ചൂഷണം ചെയ്യാനും പണം മോഷ്ടിക്കാനും തട്ടിപ്പുകാര്‍ ഉപയോഗിക്കുന്ന രീതികളെ കുറിച്ചും വ്യാജ ഓഫറുകളില്‍ നിന്ന് ഉപയോക്താക്കള്‍ക്ക് അവരുടെ ഡാറ്റയും ഫണ്ടുകളും എങ്ങനെ സംരക്ഷിക്കാമെന്നതിനെ കുറിച്ചും ഇത് ചോദ്യങ്ങള്‍ ഉയര്‍ത്തുന്നു.