മയാമി– മറ്റൊരു മത്സരത്തിലും ഇതിഹാസ താരം ലയണൽ മെസ്സി കളം നിറഞ്ഞു കളിച്ചപ്പോൾ ഇന്റർ മയാമി ചരിത്രത്തിൽ ആദ്യമായി ഫൈനലിൽ. മേജർ ലീഗ് സോക്കർ ഈസ്റ്റേൺ കോൺഫറൻസിന്റെ സെമി ഫൈനലിൽ കരുത്തരായ സിൻസിനാറ്റിയെ എതിരില്ലാത്ത നാല് ഗോളുകൾക്ക് തോൽപ്പിച്ചാണ് മെസ്സിയും സംഘവും ഈസ്റ്റേൺ കോൺഫറൻസ് ഫൈനലിലേക്ക് പ്രവേശിച്ചത്. ഒരു ഗോളും മൂന്നും അസ്സിസ്റ്റുമായി നാല് ഗോളുകളിലും പങ്കാളിത്തം നേടി ലയണൽ മെസ്സി കളിയിലെ താരമായി. അർജന്റീനിയൻ താരങ്ങളായ ടാഡിയോ അലെൻഡെ ഇരട്ട ഗോളുകളും മാറ്റിയോ സിൽവെറ്റി ഒരു ഗോളും നേടി ഇരുവരും വിജയത്തിൽ നിർണായക പങ്കു വഹിച്ചു.
പത്തൊമ്പതാം മിനുറ്റിൽ സിൽവെറ്റി നൽകിയ ക്രോസ്സിൽ തല വെച്ച് മെസ്സി മയാമിയെ മുന്നിലെത്തിച്ചു. ആദ്യപകുതിയിൽ പിന്നീട് ഗോളുകൾ ഒന്നും പിറന്നില്ല. 57-ാം മിനുറ്റിൽ മെസ്സി നൽകിയ പന്തിൽ സിൽവെറ്റി ഗോൾ നേടി ലീഡ് ഇരട്ടിയാക്കി. പിന്നീട് 62,74 മിനിറ്റുകളിൽ അലെൻഡെ ഗോൾ നേടുമ്പോഴും പിന്നിൽ പ്രവർത്തിച്ചത് മെസ്സി തന്നെയായിരുന്നു.
ഇതോടെ ഫുട്ബോൾ കരിയറിൽ മെസ്സി 1300 ഗോൾ പങ്കാളിത്തം എന്ന ചരിത്ര റെക്കോർഡിന് അർഹനായി. ലോകകപ്പ് ഫുട്ബോളിൽ 1300 ഗോൾ പങ്കാളിത്തം നേടുന്ന ആദ്യ താരവും മെസ്സി തന്നെയാണ്. 1135 മത്സരങ്ങളിൽ 896 ഗോളും 404 അസ്സിസ്റ്റുമാണ് അർജന്റീനിയൻ ഇതിഹാസ താരത്തിന്റെ പേരിലുള്ളത്. മാത്രമല്ല 404 അസ്സിസ്റ്റ്‌ എന്നാ ഫ്രാങ്ക് പുഷ്കാസിന്റെ റെക്കോർഡിന് ഒപ്പവും താരമെത്തി. ഒരു അസ്സിസ്റ്റ്‌ കൂടി നൽകിയാൽ ലോക ഫുട്ബോളിലെ ഏറ്റവും കൂടുതൽ അസ്സിസ്റ്റിന്റെ റെക്കോർഡും താരത്തിന്റെ പേരിലാകും.
മയാമിയുടെ ആദ്യ ഇലവനിൽ ഇറങ്ങിയവരിൽ ഏഴു താരങ്ങളും അർജന്റീനിയൻ കളിക്കാരായിരുന്നു. പകരക്കരടക്കം 9 അർജന്റീനിയൻ താരങ്ങളാണ് മത്സരത്തിൽ പന്ത് തട്ടിയത്.