ജിദ്ദ – കടുത്ത ചൂടില്‍ നിന്ന് തീര്‍ഥാടകര്‍ക്ക് സംരക്ഷണം നല്‍കുകയും ശരീരം തണുപ്പിക്കുകയും ചെയ്യുന്ന ലോകത്തെ ആദ്യത്തെ ഹൈ-ടെക്ക് ഇഹ്റാം വസ്ത്രം പ്രദര്‍ശിപ്പിച്ച് സൗദി അറേബ്യന്‍ എയര്‍ലൈന്‍സ് (സൗദിയ). മക്കയില്‍ നിന്ന് ലോകത്തിലേക്ക് എന്ന പ്രമേയത്തില്‍ ജിദ്ദ സൂപ്പര്‍ഡോമില്‍ നടക്കുന്ന ഹജ്ജ് കോണ്‍ഫറന്‍സിലും എക്‌സിബിഷനിലുമാണ് സൗദിയ പവലിയനില്‍ ഇഹ്റാം വസ്ത്രം പ്രദര്‍ശിപ്പിക്കുന്നത്. കൂളിംഗ് സാങ്കേതികവിദ്യയുള്ള ലോകത്തിലെ ആദ്യത്തെ ഇഹ്റാമാണ് ഈ നൂതന കണ്ടുപിടുത്തം. ചര്‍മ്മത്തില്‍ അനുഭവപ്പെടുന്ന താപനില രണ്ട് ഡിഗ്രി സെല്‍ഷ്യസ് കുറച്ചുകൊണ്ട് തീര്‍ഥാടകര്‍ക്ക് ഉടനടി തണുപ്പ് നല്‍കുന്ന, പേറ്റന്റ് നേടിയ ട്രിപ്പിള്‍ ചില്‍ ഇഫക്റ്റ് സാങ്കേതികവിദ്യയുടെ പ്രോട്ടോടൈപ്പാണ് ഈ ഇഹ്റാം. നൂതനമായ തുണിത്തരങ്ങള്‍ ഈര്‍പ്പം വേഗത്തില്‍ ആഗിരണം ചെയ്യുകയും ഉണക്കുകയും ചെയ്യുന്നു. ഇതേസമയം ചൂട് അനുഭവപ്പെടുന്നത് കുറക്കുന്നതിന് വായുപ്രവാഹം വര്‍ധിപ്പിക്കുകയും ചെയ്യും.
ഇഹ്‌റാമിന്റെ പരമ്പരാഗത രൂപത്തിൽ ഇസ്‌ലാമിക മാര്‍ഗനിര്‍ദേശങ്ങള്‍ പൂര്‍ണമായും പാലിച്ച് തീര്‍ഥാടന കര്‍മങ്ങള്‍ക്കിടയില്‍ സുഖസൗകര്യങ്ങള്‍ വര്‍ധിപ്പിക്കുന്ന സാങ്കേതിക സവിശേഷത ഉള്‍പ്പെടുത്തി മതപരമായ പ്രതീകാത്മകത നിലനിര്‍ത്തുന്ന രീതിയിലാണ് ഹൈ-ടെക്ക് കൂളിംഗ് ഇഹ്റാം . ആഗോള പങ്കാളികളുമായി സഹകരിച്ചാണ് സൗദിയ കൂളിംഗ് ഇഹ്റാം വികസിപ്പിച്ചത്.
അടുത്ത ഹജ്ജ്, ഉംറ സീസണില്‍ തീര്‍ഥാടകര്‍ക്ക് പുതിയ ഇഹ്റാം ലഭ്യമാകും. പുരുഷന്മാര്‍ക്കുള്ള ഇഹ്റാമും സ്ത്രീകള്‍ക്കുള്ള പര്‍ദയും ഉള്‍പ്പെടെ പരിമിതമായ ഇഹ്‌റാമുകളാണ് തുടക്കത്തില്‍ ലഭ്യമാവുക. ഭാവിയില്‍ ലഭ്യത വര്‍ധിപ്പിക്കാന്‍ പദ്ധതിയുണ്ട്. ആത്മീയ യാത്ര സുഗമമാക്കാനും തീര്‍ഥാടകരുടെ അനുഭവം വര്‍ധിപ്പിക്കാനുമുള്ള സൗദി അറേബ്യയുടെ പ്രയാണത്തിലെ പുതിയ ചുവടുവെപ്പാണ് കൂളിംഗ് ഇഹ്റാം. വിമാന യാത്രയില്‍ ആരംഭിച്ച് കൂടുതല്‍ ഉന്മേഷദായകവും തണുത്തതുമായ അന്തരീക്ഷത്തില്‍ ത്വവാഫിന്റെയും സഅ്യിന്റെയും നിമിഷം വരെ നീളുന്ന സുഖസൗകര്യങ്ങള്‍ നിറഞ്ഞ യാത്രയുടെ അവിഭാജ്യ ഘടകമായി കൂളിംഗ് ഇഹ്റാം മാറും.