തിരുവനന്തപുരം: അമിത വേഗതയില്‍ വന്ന രണ്ട് ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ തലസ്ഥാനത്ത് പതിനേഴുകാരന് ദാരുണാന്ത്യം. അതിയന്നൂര്‍ മരുതംകോട് സ്വദേശി ആദര്‍ശ് (17) ആണ് അപകടത്തില്‍ മരിച്ചത്. തിങ്കളാഴ്ച കാഞ്ഞിരംകുളം ചാവടി ജങ്ഷന് സമീപമായിരുന്നു മരണത്തിലേക്ക് നയിച്ച അപകടം നടന്നത്. വീഴ്ചയില്‍ തലയ്ക്കും മുഖത്തും ഗുരുതര പരിക്കേറ്റ ആദര്‍ശിനെ ഉടന്‍ നെയ്യാറ്റിന്‍കര സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും രാത്രി പത്തോടെയാണ് മരിച്ചതെന്ന് ബന്ധുക്കള്‍ അറിയിച്ചു.
കാഞ്ഞിരംകുളത്തു നിന്ന് പുല്ലുവിളയിലേക്ക് മൂന്നു പേരുമായി വന്ന ഒരു ബൈക്കും പുല്ലുവിളയില്‍ നിന്ന് ചാവടിയിലേക്ക് മൂന്നു പേരുമായി പോവുകയായിരുന്ന മറ്റൊരു ബൈക്കും തമ്മില്‍ കൂട്ടിയിടിച്ചാണ് അപകടമുണ്ടായത്. ഇരു ബൈക്കുകളും അമിത വേഗത്തിലാണ് സഞ്ചരിച്ചിരുന്നതെന്ന് ദൃക്‌സാക്ഷികള്‍ പറഞ്ഞു. പ്ലസ്ടു പൂര്‍ത്തിയാക്കി തുടര്‍പഠനം കാത്തിരിക്കുകയായിരുന്നു ആദര്‍ശ്.
നെയ്യാറ്റിന്‍കര ജനറല്‍ ആശുപത്രി മോര്‍ച്ചറിയില്‍ നിന്ന് പോസ്റ്റ്മാര്‍ട്ട് നടത്തിയ ശേഷം അവിടെ തന്നെ സൂക്ഷിച്ചിരിക്കുകയാണ് മൃതദേഹം. വിദേശത്തുള്ള അമ്മ നാട്ടിലെത്തിയ ശേഷമാണ് ശേഷം നാളെ രാവിലെ പതിനൊന്നോടെ സംസ്‌കരിക്കും. അച്ഛന്‍: ജയന്‍, അമ്മ: അജിതകുമാരി, സഹോദരന്‍: ആകാശ്.
അപകടത്തില്‍ പരുക്കേറ്റ അവണാകുഴി സ്വദേശി മനു, ബാലരാമപുരം സ്വദേശി മനു, ചാവടി സ്വദേശികളായ വിശാഖ്, അപ്പു, അരുണ്‍ എന്നിവരെ തിരുവനന്തപുരം മെഡിക്കല്‍ കോളെജ് ആശുപത്രിയില്‍ പ്രവേശിപ്പിച്ചിരിക്കുകയാണ്. കാഞ്ഞിരംകുളം പൊലീസ് കേസെടുത്ത് അന്വേഷണം നടത്തുകയാണ്.