ന്യൂഡൽഹി– ന്യൂഡല്ഹിയിലെ ദരിയാഗഞ്ചിലെ ശ്യാംലാല് മാര്ഗിൽ പണിതുയർത്തിയ മുസ്ലിംലീഗ് ദേശീയ ആസ്ഥാന മന്ദിരം ‘ഖാഇദേ മില്ലത്ത് സെന്റര്’ ഉദ്ഘാടനം നാളെ. ദേശീയ രാഷ്ട്രീയകാര്യ സമിതി ചെയര്മാന് പാണക്കാട് സയ്യിദ് സാദിഖലി ശിഹാബ് തങ്ങളാണ് ഓഫീസ് നാടിന് സമർപ്പിക്കുക.
കോണ്ഗ്രസ് പാര്ലമെന്ററി പാര്ട്ടി നേതാവ് സോണിയ ഗാന്ധി, സമാജ്വാദി പാര്ട്ടി നേതാവ് അഖിലേഷ് യാദവ് തുടങ്ങിയവരും ഇന്ത്യ സഖ്യത്തിലെ മറ്റ് ഉന്നത നേതാക്കളും അതിഥികൾ ആയിരിക്കും.മുതിര്ന്ന അഭിഭാഷകനും പാര്ലമെന്റ് അംഗവുമായ കപില് സിബല് ‘ഇലക്ഷന് ഫ്രോഡ്: ഡെത്ത് ഓഫ് ഡെമോക്രസി’ എന്ന വിഷയത്തില് നടത്തുന്ന മുഖ്യപ്രഭാഷണം ശ്രദ്ധേയമാവും.
രാഷ്ട്രീയ സാമൂഹിക മേഖലകളിലെ പ്രമുഖരും വിവിധ സംസ്ഥാനങ്ങളില് നിന്നും രജിസ്റ്റര് ചെയ്ത മുസ്ലിംലീഗ് പ്രതിനിധികളും നേതാക്കളുമടക്കം 3,000 പേരും ജവഹര്ലാല് നെഹ്റു സ്റ്റേഡിയം വെയിറ്റ് ലിഫ്റ്റിങ് ഹാളില് നടക്കുന്ന ഉദ്ഘാടന സമ്മേളനത്തില് പങ്കെടുക്കും.
അഞ്ച് നിലകളിലായാണ് സമുച്ചയം. ദേശീയ ഭാരവാഹികള്ക്കുള്ള ഓഫീസുകള്, മീറ്റിങ് ഹാളുകള്, വര്ക്ക് സ്പേസുകളും കൂടാതെ കൊമേഴ്സ്യല് സ്പേസ്, ബോര്ഡ് റൂം, ഡിജിറ്റല് സ്ക്രീനോടുകൂടിയ കോണ്ഫറന്സ് ഹാള്, പബ്ലിക് ഹാള്, ഡെയിനിങ് ഏരിയ, പ്രാര്ഥനാ മുറി എന്നിവ ഉള്പ്പെടുത്തി അത്യാധുനിക സംവിധാനങ്ങങ്ങളും സൗകര്യങ്ങളുമുണ്ട്.
സമ്മേളനത്തിന്റെ മുന്നോടിയായി നടന്ന വാർത്താ സമ്മേളനത്തില് ദേശീയ രാഷ്ട്രീയ ഉപദേശകസമിതി ചെയര്മാന് സയ്യിദ് സാദിഖലി ശിഹാബ് തങ്ങള്, ദേശീയ പ്രസിഡന്റ് പ്രൊഫ. കെ.എം ഖാദര് മൊയ്തീന്, ജനറല് സെക്രട്ടറി പി.കെ കുഞ്ഞാലിക്കുട്ടി, ട്രഷറര് പി.വി അബ്ദുല് വഹാബ് എംപി, ഓര്ഗനൈസിങ് സെക്രട്ടറി ഇ.ടി മുഹമ്മദ് ബഷീര് എംപി, ഭാരവാഹികളായ അബ്ദുല് സമദ് സമദാനി എംപി, അഡ്വ.ഹാരിസ് ബീരാന് എംപി, ഖുർറം അനീസ് ഉമര് തുടങ്ങിയവര് പങ്കെടുത്തു.